ರಸ್ತೆ ದಾಟುತ್ತಿದ್ದಾಗ ಶಾಲಾ ಬಸ್‌ ಡಿಕ್ಕಿ; 8 ವರ್ಷದ ಬಾಲಕಿ ದುರ್ಮರಣ
ತಿರುವನಂತಪುರಂ; ಶಾಲೆಯಿಂದ ಮನೆಗೆ ಯಾವ ಬಸ್‌ನಲ್ಲಿ ಬಂದಳೋ ಅದೇ ಬಸ್‌ಗೆ ಪುಟಾಣಿ ಬಾಲಕಿ ಜೀವ ತೆತ್ತಿದ್ದಾಳೆ. ಕೇರಳದ ತಿರುವನಂತಪುರದ ವೇಲೂರು ಎಂಬಲ್ಲಿ ಈ ದುರ್ಘಟನೆ ಇಂದು ಸಂಜೆ ನಡೆದಿದೆ.
ತಲಕ್ಕೊಟ್ಟುಕರದ ಒಐಇಟಿ ಪಬ್ಲಿಕ್ ಸ್ಕೂಲ್‍ನಲ್ಲಿ 2ನೇ ತರಗತಿ ಓದುತ್ತಿದ್ದ ದಿಯಾ ಎಂಬ ಎಂಟು ವರ್ಷದ ಬಾಲಕಿಯೇ ಸಾವನ್ನಪ್ಪಿದ ದುರ್ದೈವಿ. ಈಕೆ ಇಂದು ಸಂಜೆ ಶಾಲೆ ಮುಗಿಸಿ ಬಸ್‌ನಲ್ಲಿ ಮನೆಗೆ ಬಂದಿದ್ದಾಳೆ. ಮನೆ ಬಳಿ ಶಾಲಾ ಬಸ್‌ನಿಂದ ಇಳಿದಿದ್ದಾಳೆ. ನಂತರ ಆಕೆ ರಸ್ತೆ ದಾಟುತ್ತಿದ್ದಾಗ, ಬಸ್‌ ಚಾಲಕ ಅದನ್ನು ಗಮನಿಸದೇ ಏಕಾಎಕಿ ಬಸ್‌ ಚಲಾಯಿಸಿದ್ದಾನೆ. ಇದರಿಂದ ತೀವ್ರವಾಗಿ ಗಾಯಗೊಂಡಿದ್ದ ದಿಯಾಳನ್ನು ಆಸ್ಪತ್ರೆಗೆ ಕೊಂಡೊಯ್ಯಲಾಯಿತಾದರೂ, ಅಷ್ಟೊತ್ತಿಗಾಗಲೇ ಆಕೆ ಅಸುನೀಗಿದ್ದಳು.
