ಮೆಟ್ರೋದಲ್ಲಿ ಗೋಬಿ ತಿಂದು ಫೋಸು ಕೊಟ್ಟವನಿಗೆ ದಂಡ!
ಬೆಂಗಳೂರು; ಮೆಟ್ರೋದಲ್ಲಿ ಆಹಾರ ಸೇವನೆ ನಿಷಿದ್ಧವಿದೆ. ಹೀಗಿದ್ದರೂ ವ್ಯಕ್ತಿಯೊಬ್ಬರು ಬೇಕಂತಾನೇ ಗೋಬಿ ಸೇವನೆ ಮಾಡಿದ್ದರು. ಅದನ್ನು ಅವರ ಸ್ನೇಹಿತರೇ ವಿಡಿಯೋ ಮಾಡಿ, ಆತನನ್ನು ಲೇವಡಿ ಮಾಡಿದ್ದರು. ನಂತರ ಅವರೇ ಸೋಷಿಯಲ್‌ ಮೀಡಿಯಾದಲ್ಲಿ ವಿಡಿಯೋ ಹಂಚಿಕೊಂಡಿದ್ದರು. ಇದೀಗ ಮಾಡಿದ ತಪ್ಪಿಗಾಗಿ ದಂಡ ತೆತ್ತಿದ್ದಾರೆ.
ಗೋಬಿ ತಿಂದ ವ್ಯಕ್ತಿಯ ಸ್ನೇಹಿತರೇ ವಿಡಿಯೋ ವೈರಲ್‌ ಮಾಡಿದ್ದರು. ಈ ವಿಡಿಯೋ ಬಗ್ಗೆ ಬಿಎಂಆರ್‌ಸಿಎಲ್‌ ಅಧಿಕಾರಿಗಳ ಗಮನಕ್ಕೂ ಬಂದಿದೆ. ಇದೀಗ ಮೆಟ್ರೋ ಅಧಿಕಾರಿಗಳು ಗೋಬಿ ತಿಂದ ಪ್ರಯಾಣಿಕನ್ನು ಹುಡುಕಿದ್ದಾರೆ. ಆತನನ್ನು ಸುನೀಲ್‌ ಕುಮಾರ್‌ ಎಂದು ಗುರುತಿಸಲಾಗಿದ್ದು, ಜಯನಗರದ ಅಭರಣ ಮಳಿಗೆಯೊಂದರಲ್ಲಿ ಕೆಲಸ ಮಾಡುತ್ತಾನೆ.
ಮೆಟ್ರೋ ಅಧಿಕಾರಿಗಳು ಸುನೀಲ್‌ ಕುಮಾರ್‌ಗೆ ದಂಡ ವಿಧಿಸುವಂತೆ ತಮ್ಮ ಸಿಬ್ಬಂದಿ ಸೂಚನೆ ಕೊಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಸುನೀಲ್‌ ಕುಮಾರ್‌ ಎಂದಿನಂತೆ ಜಯನಗರ ಮೆಟ್ರೋ ನಿಲ್ದಾಣಕ್ಕೆ ಬಂದಾಗ ಮೆಟ್ರೋ ಸಿಬ್ಬಂದಿ ಆತನನ್ನು ತಡೆದಿದ್ದಾರೆ. 500 ರೂಪಾಯಿ ದಂಡ ವಿಧಿಸಿದ್ದಲ್ಲದೆ, ಜಯನಗರ ಪೊಲೀಸ್‌ ಠಾಣೆಗೆ ಕರೆದೊಯ್ದು, ಮತ್ತೊಮ್ಮೆ ಈ ರೀತಿ ವರ್ತಿಸದಂತೆ ಎಚ್ಚರಿಕೆ ಕೊಡಿಸಿ ಕಳುಹಿಸಿದ್ದಾರೆ.
