ದಿವ್ಯಾ ಹಾಗರಗಿ ಹಿಂದೆ ಯಾವ ದಿವ್ಯ ಶಕ್ತಿ ಇದೆ..?; ಪ್ರಿಯಾಂಕ್‌ ಖರ್ಗೆ ಪ್ರಶ್ನೆ
ಕಲಬುರಗಿ; ಪಿಎಸ್‌ಐ ಅಕ್ರಮದ ಪ್ರಮುಖ ಆರೋಪಿ ದಿವ್ಯಾ ಹಾಗರಗಿ ಹಿಂದೆ ಯಾವ ದಿವ್ಯ ಶಕ್ತಿ ಇದೆ..?. ಅವರನ್ನು ಇನ್ನೂ ಯಾಕೆ ಬಂಧಿಸಿಲ್ಲ ಎಂದು ಶಾಸಕ ಪ್ರಿಯಾಂಕ್‌ ಖರ್ಗೆ ಪ್ರಶ್ನೆ ಮಾಡಿದ್ದಾರೆ. ಕಲಬುರಗಿಯಲ್ಲಿ ಮಾತನಾಡಿದ ಅವರು, ಪಿಎಸ್‌ಐ ಅಕ್ರಮದಲ್ಲಿ ಬಿಜೆಪಿಯವರಿಗೂ ಪಾಲು ಹೋಗಿದೆ. ಸಿಐಡಿ ಅವರು ಕಲಬುರಗಿ ಸುತ್ತಮುತ್ತಲೇ ತನಿಖೆ ಮಾಡುತ್ತಿದ್ದಾರೆ. ಅವರು ಬೆಂಗಳೂರಿನವರೆಗೆ ತನಿಖೆ ನಡೆಸಿದರೆ ವಿಧಾನಸೌಧದಲ್ಲಿರುವ ಯಾವ ಸಚಿವರುಗಳಿಗೆ ಮತ್ತು ಶಾಸಕರಿಗೆ ಎಷ್ಟು ದುಡ್ಡು ಹೋಗಿದೆ ಎಂಬುದು ಬಯಲಾಗುತ್ತದೆ ಎಂದರು.
ಸಿಐಡಿ ಅಧಿಕಾರಗಳು ನನಗೆ ಮತ್ತೆ ನೋಟಿಸ್ ಜಾರಿ ಮಾಡಿದ್ದಾರೆ. ಸೆಕ್ಷನ್ 91 ಪ್ರಕಾರ ನನಗೆ ಹಾಜರಾಗಿ, ದಾಖಲೆ ಒದಗಿಸುವಂತೆ ಸೂಚಿಸಿದ್ದಾರೆ. ಆದರೆ, ನಾನು ಖುದ್ದಾಗಿ ಹಾಜರಾಗಬೇಕು ಅಂತಾ ಆ ಸೆಕ್ಷನ್ ಹೇಳುವುದಿಲ್ಲ. ಬಿಜೆಪಿಯವರಿಗೆ ಕಾನೂನು ಅರಿವು ಕಡಿಮೆ ಇದೆ. ಫೆಬ್ರವರಿಯಲ್ಲಿ ಪ್ರಭು ಚವ್ಹಾಣ್ ಅವರು ಸರ್ಕಾರಕ್ಕೆ ಇದೆ ವಿಷಯವಾಗಿ ಪತ್ರ ಬರೆದಿದ್ದರು. ಬಿಜೆಪಿ ಎಂಎಲ್ಸಿ ಸಂಕನೂರ್ ಲಿಖಿತ ರೂಪದಲ್ಲೇ ಸರ್ಕಾರದ ಗಮನಕ್ಕೆ ತಂದಿದ್ದರು ಎಂದು ಪ್ರಿಯಾಂಕ್‌ ಖರ್ಗೆ ನೆನಪಿಸಿದರು.
