ಬೆಳಗಾವಿ ಬಳಿ ನವವಿವಾಹಿತನ ಕೊಚ್ಚಿ ಕೊಲೆ

ಬೆಳಗಾವಿ;  ನವವಿವಾಹಿತನನ್ನು ದುಷ್ಕರ್ಮಿಗಳು ಮಾರಕಾಸ್ತ್ರಗಳಿಂದ ಕೊಚ್ಚಿ ಕೊಲೆ ಮಾಡಿರುವ ಘಟನೆ ಬೆಳಗಾವಿ ಜಿಲ್ಲೆಯಲ್ಲಿ ನಡೆದಿದೆ. ಕಾಗವಾಡ ತಾಲೂಕಿನ ಐನಾಪುರ-ಕಾತ್ರಾಳ ಕ್ರಾಸ್​ನ ರಸ್ತೆ ಪಕ್ಕದಲ್ಲಿ ಬೈಕ್‌ನಲ್ಲಿ ತೆರಳುತ್ತಿದ್ದ ನವವಿವಾಹಿತನನ್ನು ಕೊಲೆ ಮಾಡಿ ಪರಾರಿಯಾಗಿದ್ದಾರೆ.

     ಕಾತ್ರಾಳ ಗ್ರಾಮದ ನಿವಾಸಿ ಚಿಂತಾಮಣಿ ಬಂಡಗರ (26) ಕೊಲೆಯಾದ ವ್ಯಕ್ತಿ. ಚಿಂತಾಮಣಿ‌ ಬಂಡಗರ ಎಂಟು ತಿಂಗಳ ಹಿಂದಯಷ್ಟೇ ವಿವಾಹವಾಗಿದ್ದ.  ಇತ್ತೀಚೆಗಷ್ಟೇ ಐನಾಪುರದಲ್ಲಿ ಮೆಡಿಕಲ್‌ ಶಾಪ್‌ ತೆರೆದಿದ್ದ ಚಿಂತಾಮಣಿ ಬಡಗರ, ನಿನ್ನೆ ತಡರಾತ್ರಿ ಕೆಲಸ ಮುಗಿಸಿ ಮನೆಗೆ ಬರುತ್ತಿದ್ದಾಗ ಈ ದುಷ್ಕೃತ್ಯ ಎಸಗಲಾಗಿದೆ.

    ಬೈಕ್‌ ಹಿಂಬಾಲಿಸಿದ ಕೆಲ ದುಷ್ಕರ್ಮಿಗಳು, ನಿರ್ಜನ ಪ್ರದೇಶದಲ್ಲಿ ಬೈಕ್‌ ಅಡ್ಡಗಟ್ಟಿ ಮಾರಕಾಸ್ತ್ರಗಳಿಂದ ಕೊಲೆ ಮಾಡಿ ಪರಾರಿಯಾಗಿದ್ದಾರೆ. ಆರೋಪಿಗಳಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ.