ಹಾವು ಓಡಿಸಲು ಹೊಗೆ ಹಾಕಿದರು; ಇಡೀ ಮನೆ ಸುಟ್ಟು ಭಸ್ಮವಾಯಿತು..!

ಲಖನೌ; ಮನೆಗೆ ನಾಗರಹಾವೊಂದು ನುಗ್ಗಿದ್ದು, ಅದನ್ನು ಓಡಿಸುವುದಕ್ಕಾಗಿ ಹೊಗೆ ಹಾಕಿದ ಮನೆಯವರು, ಇಡೀ ಮನೆಯನ್ನು ಕಳೆದುಕೊಂಡಿದ್ದಾರೆ. ನಾಗರಹಾವು ಓಡಿಸಲು ಹೋಗಿ ಇಡೀ ಮನೆಯೇ ಸುಟ್ಟು ಭಸ್ಮವಾಗಿದೆ. ಉತ್ತರ ಪ್ರದೇಶದ ಬಂದಾದಲ್ಲಿ ಈ ಘಟನೆ ನಡೆದಿದೆ. 

ಇಂದು ಬೆಳಗಿನ ಜಾವ ರಾಜ್‌ಕುಮಾರ್‌ ಎಂಬುವವರ ಮನೆಯೊಳಗೆ ನಾಗರಹಾವು ಬಂದಿದೆ. ಇದನ್ನು ಗಮನಿಸಿದ ಮನೆಯವರು, ಭಯಭೀತರಾಗಿದ್ದಾರೆ. ಏನಾದರೂ ಮಾಡಿ ನಾಗರಹಾವು ಓಡಿಸಲು ನಿರ್ಧರಿಸಿದ್ದಾರೆ. ಆದ್ರೆ ಏನು ಮಾಡೋದು ಎಂದು ದಿಕ್ಕುತೋದಂತಾಗಿದ್ದಾರೆ. ಕೊನೆಗೆ ಅವರು ಹೊಗೆ ಹಾಕಿದರೆ ನಾಗರಹಾವು ಅಲ್ಲಿಂದ ತೆರಳುತ್ತದೆ ಎಂದು ನಿರ್ಧರಿಸಿದ್ದಾರೆ.

ಇದಕ್ಕಾಗಿ ಅವರು ಹಸುವಿನ ಬೆರಣಿ ತಂದು ಅದಕ್ಕೆ ಬೆಂಕಿ ಹಚ್ಚಿ ಹೊಗೆ ಹಾಕಿದ್ದಾರೆ. ಈ ಬೆಂಕಿ ಅಚಾನಕ್ಕಾಗಿ ಮನೆಯ ಇತರೆ ವಸ್ತುಗಳಿಗೆ ಹರಡಿದೆ. ನೋಡ ನೋಡುತ್ತಿದ್ದಂತೆ ಅನಾಹುತ ನಡೆದುಹೋಗಿದೆ. ಇಡೀ ಮನೆಗೆ ಬೆಂಕಿ ಬಿದ್ದಿದೆ. ಮನೆಯ ಮಾಲೀಕ ರಾಜ್​ ಕುಮಾರ್​ ಕೂಲಿ ಕೆಲಸ ಮಾಡುತ್ತಾನೆ. ಈತನಿಗೆ ಪತ್ನಿ ಸೇರಿ ಐವರು ಮಕ್ಕಳಿದ್ದಾರೆ. ಆದರೆ ನಾಗರ ಹಾವು ಓಡಿಸಲು ಇಡೀ ಮನೆ ಕಳೆದುಕೊಂಡಿದ್ದಾರೆ.  ಜೊತೆಗೆ ನಗದು , ಚಿನ್ನಾಭರಣ, ಕ್ವಿಂಟಾಲ್​ ಗಟ್ಟಲೆ ದವಸ-ಧಾನ್ಯ ಎಲ್ಲವೂ ಬೂದಿಯಾಗಿದೆ.