ಕೋಲ್ಡ್‌ ಸ್ಟೋರೇಜ್‌ ಮೇಲ್ಛಾವಣಿ ಕುಸಿತ; 8 ಮಂದಿ ದುರ್ಮರಣ
ಲಕ್ನೋ; ಶಿಥಿಲಾವಸ್ಥೆಯಲ್ಲಿದ್ದ ಆಲುಗಡ್ಡೆ ಸಂಗ್ರಹಿಸುತ್ತಿದ್ದ ಕೋಲ್ಡ್‌ ಸ್ಟೋರೇಜ್‌ ಕುಸಿದುಬಿದ್ದಿದ್ದು, ಎಂಟು ಮಂದಿ ದಾರುಣವಾಗಿ ಸಾವನ್ನಪ್ಪಿರುವ ದುರಂತ ಉತ್ತರ ಪ್ರದೇಶದ ಸಂಭಾಲ್‌ ಚಂದೌಸಿ ಎಂಬಲ್ಲಿ ನಡೆದಿದೆ. ಕೋಲ್ಡ್‌ ಸ್ಟೋರೇಜ್‌ನಲ್ಲಿ ಸುಮಾರು ಮೂವತ್ತಕ್ಕೂ ಹೆಚ್ಚು ಮಂದಿ ಇದ್ದರು ಎಂದು ಹೇಳಲಾಗುತ್ತಿದೆ. ಈಗಾಗಲೇ ಹನ್ನೊಂದು ಮಂದಿಯನ್ನು ರಕ್ಷಣೆ ಮಾಡಲಾಗಿದೆ.
ಸ್ಥಳಕ್ಕೆ ರಾಜ್ಯ ಹಾಗೂ ರಾಷ್ಟ್ರೀಯ ವಿಪತ್ತು ಪಡೆಗಳು ಆಗಮಿಸಿದ್ದು, ರಕ್ಷಣಾ ಕಾರ್ಯಾಚರಣೆ ಭರದಿಂದ ಸಾಗಿದೆ. ಅಂಕುರ್ ಅಗರ್ವಾಲ್ ಮತ್ತು ರೋಹಿತ್ ಅಗರ್ವಾಲ್ ಎಂಬುವವರಿಗೆ ಈ ಕೋಲ್ಡ್‌ ಸ್ಟೋರೇಜ್‌ ಸೇರಿದ್ದಾಗಿದೆ. ಕಟ್ಟಡ ಶಿಥಿಲವಾಗಿದ್ದರೂ ಇವರು ಅದನ್ನು ದುರಸ್ತಿ ಮಾಡಿಸಿರಲಿಲ್ಲ. ಹೀಗಾಗಿ ಈ ದುರಂತ ನಡೆದಿದೆ. ಈ ಕಾರಣಕ್ಕಾಗಿ ಇಬ್ಬರು ಮಾಲೀಕರು ಸೇರಿ ನಾಲ್ವರನ್ನು ಬಂಧಿಸಲಾಗಿದೆ.
