ಮುನಿಸು ಬಿಟ್ಟ ಮೇಲೆ ಜೆಡಿಎಸ್‌ ಕಚೇರಿಗೆ ಬಂದ ಜಿಟಿಡಿಗೆ ಸಿಹಿಯ ಸ್ವಾಗತ
ಬೆಂಗಳೂರು; ನಾಯಕರ ಮೇಲೆ ಮುನಿಸಿಕೊಂಡು ಮೂರೂವರೆ ವರ್ಷದಿಂದ ಪಕ್ಷದಿಂದ ದೂರವೇ ಇದ್ದ ಜಿ.ಟಿ.ದೇವೇಗೌಡರು ಇಂದು ಬೆಂಗಳೂರಿನ ಜೆಡಿಎಸ್‌ ಕಚೇರಿಗೆ ಆಗಮಿಸಿದ್ದರು. ಅವರನ್ನು ಸ್ವಾಗತಿಸಿದ ಮಾಜಿ ಸಿಎಂ ಕುಮಾರಸ್ವಾಮಿ ಸಿಹಿ ತಿನ್ನಿಸಿದರು.
ಶೇಷಾದ್ರಿಪುರಂನಲ್ಲಿರುವ ಜೆಪಿ ಭವನಕ್ಕೆ ಭೇಟಿ ನೀಡಿದ್ದ ಜಿ.ಟಿ.ದೇವೇಗೌಡರು ಕುಮಾರಸ್ವಾಮಿಯವರ ಜೊತೆ ಸುಮಾರು ಒಂದೂವರೆ ಗಂಟೆಗೂ ಹೆಚ್ಚು ಕಾಲ ಮಾತುಕತೆ ನಡೆಸಿದರು. ಪಕ್ಷದ ವಿದ್ಯಮಾನಗಳು, ಚುನಾವಣೆಗೆ ಸಿದ್ಧತೆಗಳು ಸೇರದಂತೆ ಹಲವು ವಿಚಾರಗಳ ಬಗ್ಗೆ ಚರ್ಚೆ ನಡೆಸಲಾಯಿತು. ಇದೇ ವೇಳೆ ಮಾತನಾಡಿದ ಜಿಟಿಡಿಯವರು, ಬೆಳಗ್ಗೆ ಸಿಎಂ ಬೊಮ್ಮಾಯಿ ಅವರನ್ನು ಭೇಟಿಯಾಗಿ ದೀಪಾವಳಿ ಶುಭಾಶಯ ಕೋರಿದ್ದೇನೆ. ರಾಜ್ಯದಲ್ಲಿ ಭಾರೀ ಮಳೆಯಿಂದಾಗಿ ನಾಲೆಗಳು, ಸೇತುವೆಗಳು, ರಸ್ತೆ ಎಲ್ಲವೂ ಹಾಳಾಗಿವೆ. ಇದೆಲ್ಲವನ್ನೂ ಅಭಿವೃದ್ಧಿ ಪಡಿಸುವ ಶಕ್ತಿ ದೇವರು ಕೊಡಲಿ ಎಂದು ಸಿಎಂ ಬೊಮ್ಮಾಯಿಯವರಿಗೆ ಶುಭ ಕೋರಿದ್ದೇನೆ ಎಂದು ತಿಳಿಸಿದರು.
