ಕಾಂಗ್ರೆಸ್‌ ʻಕಿವಿ ಮೇಲೆ ಹೂವುʼ ಜಾಹೀರಾತು; ಬಿಜೆಪಿ ವಿರುದ್ಧ ಹೂವಾಸ್ತ್ರ
ಬೆಂಗಳೂರು; ರಾಜ್ಯ ಬಿಜೆಪಿ ಸರ್ಕಾರ ಮಂಡಿಸಿದ ಬಜೆಟ್‌ ಮೇಲಿನ ಚರ್ಚೆ ವೇಳೆ ಕಾಂಗ್ರೆಸ್‌ ನಾಯಕರು ಕಿವಿ ಮೇಲೆ ಹೂವು ಇಟ್ಟುಕೊಂಡು ಬಂದು ವಿನೂತನವಾಗಿ ಪ್ರತಿಭಟನೆ ನಡೆಸಿದ್ದರು. ಈ ಮೂಲಕ ಬಿಜೆಪಿ ಸರ್ಕಾರ ಜನರ ಕಿವಿ ಮೇಲೆ ಹೂವು ಇಡುತ್ತಿದೆ ಎಂದು ಗಮನ ಸೆಳೆದಿದ್ದರು. ಇದೀಗ ಕಾಂಗ್ರೆಸ್‌ ಇದೇ ಅಸ್ತ್ರವನ್ನೂ ಚುನಾವಣಾ ಪ್ರಚಾರಕ್ಕೆ ಬಳಸಿಕೊಳ್ಳುತ್ತಿದೆ.
ಕಾಂಗ್ರೆಸ್‌ ಪ್ರಚಾರಕ್ಕಾಗಿ ಟಿವಿಗಳಲ್ಲಿ ವಿಡಿಯೋ ಜಾಹೀರಾತುಗಳನ್ನು ನೀಡುತ್ತಿದೆ. ಅದರಲ್ಲಿ ಕಿವಿ ಮೇಲೆ ಹೂವು ಇಡುವ ಜಾಹೀರಾತು ಕೂಡಾ ಒಂದು. ಬಿಜೆಪಿ ಸರ್ಕಾರ ಯಾರ್ಯಾರಿಗೆ ಹೇಗೇಗೆ ಕಿವಿ ಮೇಲೆ ಹೂವಿಟ್ಟಿದೆ ಎಂಬುದನ್ನು ತೋರಿಸುವ ಜಾಹೀರಾತು ಇದಾಗಿದೆ. ಬಿಜೆಪಿಯವರು ಕಳೆದ ಚುನಾವಣೆಯಲ್ಲಿ ನೀಡಿದ ಭರವಸೆಗಳಲ್ಲಿ ಶೇ.90ರಷ್ಟು ಈಡೇರಿಸಿಲ್ಲ. ಜನಸಾಮಾನ್ಯರನ್ನು ಸರ್ಕಾರ ಹೇಗೆಲ್ಲಾ ವಂಚಿಸುತ್ತಿದೆ ಎಂಬುದನ್ನು ಈ ಜಾಹೀರಾತಿನ ಮೂಲಕ ಎತ್ತಿ ತೋರಿಸಲಾಗಿದೆ.
