ನಾಳೆ ಬಂದ್‌ ಇದ್ರೂ ಬಿಎಂಟಿಸಿ, ಕೆಎಸ್‌ಟಿಸಿ ಬಸ್‌ಗಳು ಓಡಾಡುತ್ತವೆ..!
ಬೆಂಗಳೂರು; ನಾಳೆ ಕರ್ನಾಟಕ ಬಂದ್‌ಗೆ ಕರೆ ನೀಡಲಾಗಿದೆ. ನೂರಾರು ಸಂಘಟನೆಗಳು ಬಂದ್‌ಗೆ ಬೆಂಬಲ ಸೂಚಿಸಿವೆ. ಆದ್ರೆ, ಕೆಎಸ್‌ಆರ್‌ಟಿಸಿ ಹಾಗೂ ಬಿಎಂಟಿಸಿ ನಿಗಮಗಳು ತಮ್ಮ ನೌಕರರಿಗೆ ರಜೆ ಕೊಟ್ಟಿಲ್ಲ. ಬಂದ್‌ ದಿನ ಬಸ್‌ಗಳ ಸಂಚಾರ ಇರುತ್ತದೆ. ಕಡ್ಡಾಯವಾಗಿ ನೌಕರರು ಕೆಲಸಕ್ಕೆ ಹಾಜರಾಗಬೇಕೆಂದು ಸೂಚನೆ ಕೊಟ್ಟಿದೆ.
ಸಾರಿಗೆ ಸೇವೆ ಅಗತ್ಯ ಸೇವೆಗಳಡಿಯಲ್ಲಿ ಬರುತ್ತದೆ. ಹೀಗಾಗಿ ನಾಳೆ ಸರ್ಕಾರಿ ಬಸ್‌ಗಳ ಸಂಚಾರವಿರಲಿದೆ. ಕಡ್ಡಾಯವಾಗಿ ಎಲ್ಲರೂ ಕೆಲಸಕ್ಕೆ ಹಾಜರಾಗಬೇಕು. ದೀರ್ಘಾವಧಿ ರಜೆ ಪಡೆದವರು ಹಾಗೂ ವಾರದ ರಜೆ ಇರುವವರು ಬಿಟ್ಟು ಬೇರೆ ಯಾರೂ ರಜೆ ಪಡೆಯುವ ಹಾಗಿಲ್ಲ. ಅನಗತ್ಯವಾಗಿ ನಾಳೆ ರಜೆ ಹಾಕಿದರೆ ಅಗತ್ಯ ಕ್ರಮ ಕೈಗೊಳ್ಳಲಾಗುವುದು ಎಂದು ಸಾರಿಗೆ ನಿಗಮಗಳು ತಮ್ಮ ನೌಕರರಿಗೆ ಎಚ್ಚರಿಕೆ ಕೊಟ್ಟಿವೆ.
