ಸಿಂಗಾಪುರಕ್ಕೆ ಶ್ರೀಲಂಕಾ ಅಧ್ಯಕ್ಷ ಗೊಟಬಯ ರಾಜಪಕ್ಸೆ ಕುಟುಂಬ
ಮಾಲ್ಡೀವ್ಸ್; ನಾಗರಿಕ ದಂಗೆಯಿಂದ ಕಂಗೆಟ್ಟು ಕೆಲದಿನ ತಲೆಮರೆಸಿಕೊಂಡು ನಂತರ ಮಾಲ್ಡೀವ್ಸ್‌ಗೆ ತೆರಳಿದ್ದ ಶ್ರೀಲಂಕಾ ಅಧ್ಯಕ್ಷ ಗೊಟಬಯ ರಾಜಪಕ್ಸೆ ಈಗ ಸಿಂಗಾಪುರದತ್ತ ಪ್ರಯಾಣ ಬೆಳೆಸಿದ್ದಾರೆ. ಖಾಸಗಿ ಜೆಟ್‌ ಮೂಲಕ ಗೊಟಬಯ ಹಾಗೂ ಅವರ ಪತ್ನಿ ಸಿಂಗಾಪುರಕ್ಕೆ ತೆರಳಿದ್ದಾರೆ.
ಗೊಟಬಯ ರಾಜಪಕ್ಸೆ ಅವರು ನಿನ್ನೆ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕಿತ್ತು. ಆದ್ರೆ ಅದಕ್ಕಿಂತ ಮೊದಲೇ ಅವರು ಮಾಲ್ಡೀವ್ಸ್‌ಗೆ ಪಲಾಯನ ಮಾಡಿದ್ದರು. ಸೇನಾ ವಿಮಾನದಲ್ಲಿ ಗೊಟಬಯ ಹಾಗೂ ಅವರ ಪತ್ನಿ ಅಯೋಮಾ ರಾಜಪಕ್ಸೆ, ಇಬ್ಬರು ಭದ್ರತಾ ಅಧಿಕಾರಿಗಳು ಮಾಲ್ಡೀವ್ಸ್‌ಗೆ ತೆರಳಿದ್ದರು. ಅಲ್ಲಿಂದ ಅವರು ಸಿಂಗಾಪುರಕ್ಕೆ ತೆರಳಬೇಕು. ಖಾಸಗಿ ಜೆಟ್‌ ವ್ಯವಸ್ಥೆ ಮಾಡಿ ಎಂದು ಮಾಲ್ಡೀವ್ಸ್ ಸರ್ಕಾರವನ್ನು ಕೋರಿದ್ದರು.
ಮಾಲೆಯಿಂದ ಸಿಂಗಾಪುರಕ್ಕೆ ನಿನ್ನೆ ರಾತ್ರಿಯೇ ಸಿಂಗಾಪುರ್ ಏರ್‌ಲೈನ್ಸ್ ವಿಮಾನವನ್ನು ಹತ್ತಬೇಕಿತ್ತು ಆದರೆ ಭದ್ರತಾ ಕಾರಣಗಳಿಂದಾಗಿ ಅದು ಸಾಧ್ಯವಾಗಲಿಲ್ಲ. ಮಾಲ್ಡೀವ್ಸ್‌ನಿಂದ ಹೊರಡಲು ಖಾಸಗಿ ಜೆಟ್‌ಗೆ ರಾಜಪಕ್ಸೆ ಮನವಿ ಮಾಡಿದ್ದರು ಮತ್ತು ತಡರಾತ್ರಿ ಮಾಲ್ಡೀವ್ಸ್ ಅಧಿಕಾರಿಗಳು ಚರ್ಚೆಯನ್ನು ನಡೆಸಿದ್ದರು. ಈಗ ಜೆಟ್‌ ವೆಲಾನಾ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದು, ಅಲ್ಲಿಂದ ಗೊಟಬಯ ಸಿಂಗಾಪುರಕ್ಕೆ ಪ್ರಯಾಣ ಬೆಳೆಸಿದ್ದಾರೆ.
