ದಾಲ್‌ ಸರೋವರದಲ್ಲಿ ಬೆಂಕಿ ದುರಂತ; ಹೌಸ್‌ ಬೋಟ್‌ ಸುಟ್ಟು ಭಸ್ಮ
ಜಮ್ಮು-ಕಾಶ್ಮೀರ: ಶ್ರೀನಗರದ ದಾಲ್‌ ಸರೋವರದಲ್ಲಿ ಬೆಂಕಿ ಅನಾಹುತ ಸಂಭವಿಸಿದೆ. ದಾಲ್‌ ಸರೋವರದ ಘಾಟ್‌ ನಂಬರ್‌ 9ರ ಬಳಿ ನಿಲ್ಲಿಸಲಾಗಿದ್ದ ಹೌಸ್‌ ಬೋಟ್‌ನಲ್ಲಿ ಆಕಸ್ಮಿಕವಾಗಿ ಬೆಂಕಿ ಕಾಣಿಸಿಕೊಂಡು ಹೊತ್ತಿ ಉರಿದಿದೆ. ಈ ವೇಳೆ ಅಕ್ಕಪಕ್ಕದಲ್ಲೂ ಹಲವು ಹೌಸ್‌ ಬೋಟ್‌ಗಳಿದ್ದವು. ಅಲ್ಲಿನ ಸಿಬ್ಬಂದಿ ಹಾಗೂ ಸಿಆರ್‌ಪಿಎಫ್‌ ಸಿಬ್ಬಂದಿ ಸಮಯ ಪ್ರಜ್ಞೆಯಿಂದ ಬೆಂಕಿ ಬೇರೆ ಬೋಟ್‌ಗಳಿಗೆ ವ್ಯಾಪಿಸಿಲ್ಲ. ಬಹುಬೇಗ ನಂದಿಸಿದ್ದರಿಂದ ದೊಡ್ಡ ಅನಾಹುತ ತಪ್ಪಿದೆ.
ರಾತ್ರಿ ವೇಳೆ ಹೌಸ್‌ ಬೋಟ್‌ಗಳನ್ನು ಲಂಗರು ಹಾಕಲಾಗಿತ್ತು. ಈ ವೇಳೆ ಮಧ್ಯದಲ್ಲಿದ್ದ ಬೋಟ್‌ ಒಂದಕ್ಕೆ ಬೆಂಕಿ ತಗುಲಿದೆ. ಅದು ಇದ್ದಕ್ಕಿದ್ದಂತೆ ಬೋಟ್‌ ತುಂಬಾ ವ್ಯಾಪಿಸಿ, ಬೆಂಕಿಯ ಕೆನ್ನಾಲಿಗೆ ಚಾಚಿದೆ. ಅಲ್ಲಿದ್ದ ಸಿಬ್ಬಂದಿ ಹಾಗೂ ಹತ್ತಿರದಲ್ಲೇ ಇದ್ದ ಸಿಆರ್‌ಪಿಎಫ್‌ ಸಿಬ್ಬಂದಿ ಸ್ಥಳಕ್ಕಾಗಮಿಸಿ ಬೆಂಕಿಯನ್ನು ನಿಯಂತ್ರಿಸಿದ್ದಾರೆ. ಅನಂತರ, ಅಗ್ನಿಶಾಮಕ ಸಿಬ್ಬಂದಿಯೂ ಜೊತೆಯಾಗಿದ್ದು, ಬಹುಬೇಗ ಬೆಂಕಿಯನ್ನು ನಂದಿಸಿದ್ದಾರೆ. ಘಟನೆ ಕಾರಣ ತಿಳಿದುಬಂದಿಲ್ಲ.
