ಲ್ಯಾಬ್‌ನಲ್ಲಿ ವಜ್ರ ಹೇಗೆ ತಯಾರಾಗುತ್ತೆ..?; ಬೈಡನ್ ಪತ್ನಿ ಜಿಲ್‌ಗೆ ಮೋದಿ ನೀಡಿದ ವಜ್ರದ ವಿಶೇಷತೆ ಏನು?
ಅಮೆರಿಕ ಪ್ರವಾಸದಲ್ಲಿರುವ ಭಾರತದ ಪ್ರಧಾನಿ ನರೇಂದ್ರ ಮೋದಿ ಬುಧವಾರ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ದಂಪತಿಗೆ ಭಾರತ ದೇಶದ ಸಂಸ್ಕೃತಿಯನ್ನು ಬಿಂಬಿಸುವ ಹಲವು ಉಡುಗೊರೆಗಳನ್ನು ನೀಡಿದ್ದಾರೆ. ಹತ್ತು ರೀತಿಯ ಉಡುಗೊರೆಗಳಲ್ಲಿ ಒಂದಾದ ಹಸಿರು ವಜ್ರದ ಬಗ್ಗೆ ಹೆಚ್ಚು ಚರ್ಚೆಯಾಗುತ್ತಿದೆ. ಹಾಗಾದ್ರೆ ಏನಿದು ಹಸಿರು ವಜ್ರ..? ಇದರ ವಿಶೇಷತೆ ಏನು..? ತಿಳಿಯೋಣ.
ಭಾರತದ ಪ್ರಧಾನಿ ಮೋದಿ ಅವರು ಯುಎಸ್ ಪ್ರಥಮ ಮಹಿಳೆ ಜಿಲ್ ಬಿಡೆನ್ ಅವರಿಗೆ 7.5 ಕ್ಯಾರೆಟ್ ಪರಿಸರ ಸ್ನೇಹಿ ವಜ್ರವನ್ನು ಉಡುಗೊರೆಯಾಗಿ ನೀಡಿದರು. ಮೋದಿ ನೀಡಿದ ವಜ್ರ ಅತ್ಯ ಬೆಲೆಬಾಳುವಂತಹದ್ದು. ಆಧುನಿಕ ತಂತ್ರಜ್ಞಾನದ ಪ್ರಯೋಗಾಲಯದಲ್ಲಿ ಇದನ್ನು ತಯಾರಿಸಲಾಗಿದೆ. ನವೀಕರಿಸಬಹುದಾದ ಸಂಪನ್ಮೂಲಗಳನ್ನು ಬಳಸಿ ಅತ್ಯಾಧುನಿಕ ಲ್ಯಾಬ್‌ನಲ್ಲಿ ಈ ವಜ್ರವನ್ನು ತಯಾರು ಮಾಡಲಾಗಿದೆ.
ಇದು ಲ್ಯಾಬ್ ನಿರ್ಮಿತ ವಜ್ರವಾಗಿದ್ದರೂ, ಭೂಮಿಯಲ್ಲಿ ಕಂಡುಬರುವ ವಜ್ರದ ಎಲ್ಲಾ ಗುಣಲಕ್ಷಣಗಳನ್ನು ಹೊಂದಿದೆ.
ಲ್ಯಾಬ್ ನಿರ್ಮಿತ ವಜ್ರ ಅಂದ್ರೆ ಏನು?
ಲ್ಯಾಬ್‌ನಲ್ಲಿ ತಯಾರಿಸಿದ ವಜ್ರ ಎಂದಾಕ್ಷಣ ಹಲವು ಪ್ರಶ್ನೆಗಳು ಏಳುತ್ತವೆ. ಅದನ್ನು ಹೇಗೆ ತಯಾರಿಸಲಾಗುತ್ತದೆ? ಅದರ ವಿಶೇಷತೆ ಏನು? ಸಾಮಾನ್ಯ ವಜ್ರಗಳಿಗಿಂತ ಇದು ಹೇಗೆ ಭಿನ್ನವಾಗಿದೆ? ಎಂಬ ಪ್ರಶ್ನೆಗಳು ನಿಮಗೂ ಮೂಡಬಹುದು. ಈ ಬಗ್ಗೆ ವಜ್ರ ಉದ್ಯಮದ ತಜ್ಞರು ಸ್ಪಷ್ಟ ಮಾಹಿತಿ ಒದಗಿಸಿದ್ದಾರೆ.
ಹಸಿರು ವಜ್ರ ತಯಾರಿಸಿದವರು ಯಾರು ಗೊತ್ತಾ..?
ಪ್ರಧಾನಿ ಮೋದಿ ಅವರು ಅಮೆರಿಕದ ಪ್ರಥಮ ಮಹಿಳೆ ಜಿಲ್ ಬೈಡೆನ್ ಅವರಿಗೆ ಉಡುಗೊರೆಯಾಗಿ ನೀಡಿದ ವಜ್ರವನ್ನು ಗುಜರಾತ್‌ನ ಸೂರತ್‌ನಲ್ಲಿ ತಯಾರಿಸಲಾಗಿದೆ. ಸೂರತ್ ಅನ್ನು ಭಾರತದ ವಜ್ರ ಉದ್ಯಮದ ಕೇಂದ್ರ ಎಂದು ಕರೆಯಲಾಗುತ್ತದೆ. ಪ್ರಪಂಚದ ಪ್ರತಿ 11 ವಜ್ರಗಳಲ್ಲಿ 9 ಸೂರತ್‌ನಲ್ಲಿ ಕತ್ತರಿಸಿ ಪಾಲಿಶ್ ಮಾಡಲಾಗುತ್ತದೆ. ಈ ಗ್ರೀನ್ ಡೈಮಂಡ್ ಅನ್ನು ಸೂರತ್‌ನಲ್ಲಿರುವ ಮುಖೇಶ್ ಪಟೇಲ್ ಅವರ ‘ಗ್ರೀನ್‌ಲ್ಯಾಬ್’ ಕಂಪನಿ ತಯಾರಿಸಿದೆ.
ಗ್ರೀನ್ ಲ್ಯಾಬ್ ಕಂಪನಿಯನ್ನು 1960 ರಲ್ಲಿ ಸ್ಥಾಪಿಸಲಾಯಿತು. ವಜ್ರಗಳನ್ನು ತಯಾರಿಸುವ ಪ್ರಮುಖ ಕಂಪನಿಗಳಲ್ಲಿ ಗ್ರೀನ್ ಲ್ಯಾಬ್ ಕೂಡಾ ಒಂದು. ಈ ಕಂಪನಿ ತನ್ನ ವಜ್ರ ಉತ್ಪಾದನಾ ಘಟಕದಲ್ಲಿ 25 MW ಸೌರ ಸ್ಥಾವರವನ್ನು ಸಹ ಸ್ಥಾಪಿಸಿದೆ. ಈ ಸೋಲಾರ್ ಪ್ಲಾಂಟ್ 90 ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿದೆ. ಗ್ರೀನ್‌ಲ್ಯಾಬ್ ಕಂಪನಿಯಲ್ಲಿ ಎರಡು ಸಾವಿರಕ್ಕೂ ಹೆಚ್ಚು ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ.
ಭಾರತದ ವಜ್ರ ಉದ್ಯಮದ ಪರವಾಗಿ ಬೈಡೆನ್ ಅವರಿಗೆ ವಜ್ರವನ್ನು ಉಡುಗೊರೆಯಾಗಿ ನೀಡಲಾಗಿದೆ ಎಂದು ಮುಖೇಶ್ ಪಟೇಲ್ ಅವರ ಪುತ್ರ ಸ್ಮಿತ್ ಪಟೇಲ್ ತಿಳಿಸಿದ್ದಾರೆ. “ಈ ವಜ್ರ ತುಂಬಾ ಮೌಲ್ಯಯುತವಾಗಿದೆ. ಇದು ಸೂರತ್‌ನ ಬೆಳೆಯುತ್ತಿರುವ ಲ್ಯಾಬ್ ನಿರ್ಮಿತ ವಜ್ರ ಉದ್ಯಮದ ಸಂಕೇತವಾಗಿದೆ” ಎಂದು ವಜ್ರ ತಯಾರಿಸಿದವರು ಹೇಳಿಕೊಂಡಿದ್ದಾರೆ.
ವಜ್ರಗಳ ಕಟ್-ಪಾಲಿಶ್ ಜೊತೆಗೆ, ಈ ಕಂಪನಿ ಲ್ಯಾಬ್‌ನಲ್ಲಿ ವಜ್ರಗಳನ್ನು ತಯಾರಿಸುತ್ತದೆ ಮತ್ತು ವಜ್ರಗಳಿಂದ ಆಭರಣಗಳನ್ನು ವಿನ್ಯಾಸಗೊಳಿಸುತ್ತದೆ. ಈ ಕಂಪನಿಯ ವಹಿವಾಟು ವರ್ಷಕ್ಕೆ ಸಾವಿರ ಕೋಟಿ ರೂಪಾಯಿಗೂ ಅಧಿಕ ಎಂದು ತಿಳಿದುಬಂದಿದೆ.
ಲ್ಯಾಬ್ ಮೇಡ್ ಗ್ರೀನ್ ಡೈಮಂಡ್ ಎಂದರೇನು?
ಜಿಲ್ ಬೈಡೆನ್ ಅವರಿಗೆ ಉಡುಗೊರೆಯಾಗಿ ನೀಡಿದ ವಜ್ರವನ್ನು ಪ್ರತಿ ಕ್ಯಾರೆಟ್‌ಗೆ ಕೇವಲ 0.028 ಗ್ರಾಂ ಕಾರ್ಬನ್ ಹೊರಸೂಸುವ ತಂತ್ರಜ್ಞಾನದೊಂದಿಗೆ ತಯಾರಿಸಲಾಗಿದೆ. ಈ ವಜ್ರವನ್ನು ಪರಿಸರ ಸ್ನೇಹಿ ಎಂದು ಪರಿಗಣಿಸಲಾಗಿದೆ. ಏಕೆಂದರೆ ಈ ವಜ್ರವನ್ನು ತಯಾರಿಸಲು ಸೌರಶಕ್ತಿ ಮತ್ತು ಪವನ ಶಕ್ತಿಯಂತಹ ಸಂಪನ್ಮೂಲಗಳನ್ನು ಬಳಸಲಾಗಿದೆ. ಇಂಟರ್‌ನ್ಯಾಷನಲ್ ಜೆಮಲಾಜಿಕಲ್ ಇನ್‌ಸ್ಟಿಟ್ಯೂಟ್‌ನ (ಐಜಿಐ) ರತ್ನವಿಜ್ಞಾನ ಪ್ರಯೋಗಾಲಯವು ಈ ವಜ್ರವನ್ನು ಪ್ರಮಾಣೀಕರಿಸಿದೆ.
ಇದು ವಜ್ರ ಹೊಂದಿರಬೇಕಾದ ಎಲ್ಲಾ ಮಾನದಂಡಗಳನ್ನು ಪೂರೈಸುತ್ತದೆ. ಈ ಹಸಿರು ವಜ್ರವು ಕಟ್, ಬಣ್ಣ ಮತ್ತು ಕ್ಯಾರೆಟ್ ವಿಷಯದಲ್ಲಿ ಎಲ್ಲಾ ಮಾನದಂಡಗಳನ್ನು ಪೂರೈಸುತ್ತದೆ. ಇದನ್ನು ಪ್ರಯೋಗಾಲಯದಲ್ಲಿ ಹೆಚ್ಚಿನ ತಾಪಮಾನ ಮತ್ತು ಹೆಚ್ಚಿನ ಒತ್ತಡದಲ್ಲಿ ತಯಾರಿಸಲಾಯಿತು.
ಸಾಮಾನ್ಯವಾಗಿ, ವಜ್ರಗಳನ್ನು ಗ್ರ್ಯಾಫೈಟ್‌ನಿಂದ ತಯಾರಿಸಲಾಗುತ್ತದೆ. ಈ ಗ್ರ್ಯಾಫೈಟ್ ಅನ್ನು 1500 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ವಿಶೇಷ ಪ್ರಕ್ರಿಯೆಯಿಂದ ವಜ್ರವಾಗಿ ಪರಿವರ್ತಿಸಲಾಗುತ್ತದೆ. ಸಂಶ್ಲೇಷಿತ ವಜ್ರಗಳನ್ನು ತಯಾರಿಸುವ ಇನ್ನೊಂದು ವಿಧಾನವೂ ಇದೆ. ಇದನ್ನು CVD ವಿಧಾನ ಅಥವಾ ರಾಸಾಯನಿಕ ಆವಿ ಶೇಖರಣೆ ಎಂದು ಕರೆಯಲಾಗುತ್ತದೆ. ಇದರಲ್ಲಿ, ಮೀಥೇನ್ ಮತ್ತು ಹೈಡ್ರೋಜನ್ ಅನಿಲಗಳನ್ನು 800 ಡಿಗ್ರಿ ಸೆಲ್ಸಿಯಸ್ ತಾಪಮಾನ ಮತ್ತು ಒತ್ತಡವಿರುವ ಕೋಣೆಗೆ ಕಳುಹಿಸಲಾಗುತ್ತದೆ. ಮೈಕ್ರೋವೇವ್, ಲೇಸರ್ ಅಥವಾ ಎಲೆಕ್ಟ್ರಾನ್ ಕಿರಣದ ಮೂಲಕ ಆ ಕೋಣೆಯಲ್ಲಿ ರಾಸಾಯನಿಕ ಕ್ರಿಯೆ ನಡೆಯುತ್ತದೆ. ಆಗ ಹೈಡ್ರೋಕಾರ್ಬನ್ ಅನಿಲದಲ್ಲಿರುವ ಕಾರ್ಬನ್ ಮೀಥೇನ್ ವಜ್ರವಾಗುತ್ತದೆ.
