Bharath brand rice; ಇಂದಿನಿಂದ 29 ರೂಪಾಯಿ ಭಾರತ್ ಬ್ರಾಂಡ್ ಅಕ್ಕಿ ಲಭ್ಯ; ಎಲ್ಲೆಲ್ಲಿ ಸಿಗುತ್ತೆ?

ಬೆಂಗಳೂರು; ಕೇಂದ್ರ ಸರ್ಕಾರ (Central government) ಸಾಮಾನ್ಯ ಜನರಿಗೆ ಅನುಕೂಲವಾಗಲೆಂದು ಭಾರತ್ ಬ್ರಾಂಡ್ (Bhart brand) ಅಕ್ಕಿಯನ್ನು ಮಾರುಕಟ್ಟೆಗೆ ಬಿಟ್ಟಿದೆ. ಇದು ಕೇವಲ ಕೆಜಿಗೆ 29 ರೂಪಾಯಿ ಮಾತ್ರ. ಕಡಿಮೆ ಬೆಲೆಗೆ ಕ್ವಾಲಿಟಿ ಅಕ್ಕಿಯನ್ನು ಕೇಂದ್ರ ಸರ್ಕಾರ ನೀಡುತ್ತಿದ್ದು, ಇಂದಿನಿಂದ ಈ ಅಕ್ಕಿ ಖರೀದಿ ಮಾಡಬಹುದು.

 

 ಬೆಂಗಳೂರಿನಲ್ಲಿ ಇಂದು ಸಂಜೆಯಿಂದ ಲಭ್ಯ

    ನಾಫೆಡ್ ಭಾರತ ರಾಷ್ಟ್ರೀಯ ಕೃಷಿ ಸಹಕಾರ ಯೋಜನೆಯಡಿ ಈ ಭಾರತ್ ಬ್ರಾಂಡ್ ಅಕ್ಕಿಯನ್ನು ಜನರಿಗೆ ನೀಡಲಾಗುತ್ತಿದೆ. ನಾಫೆಡ್ ನ ಏಳು ಸಂಚಾರಿ ವಾಹನಗಳ ಮೂಲಕ ಈ ಅಕ್ಕಿಯನ್ನು ಬೆಂಗಳೂರಿನಲ್ಲಿ ಮಾರಾಟ ಮಾಡಲಾಗುತ್ತದೆ. ಇಂದು ಸಂಜೆ 4 ಗಂಟೆಗೆ ಬೆಂಗಳೂರಿನಲ್ಲಿ ಈ ಯೋಜನೆಗೆ ಚಾಲನೆ ಸಿಗುತ್ತಿದೆ.

 

ಅಕ್ಕಿ ದರ ನಿಯಂತ್ರಿಸುವ ಉದ್ದೇಶದಿಂದ ಈ ಯೋಜನೆ

  ಇತ್ತೀಚೆಗೆ ಮಾರುಕಟ್ಟೆಯಲ್ಲಿ ಅಕ್ಕಿ ದರ ತುಂಬಾನೇ ಹೆಚ್ಚಾಗಿದೆ. ಮಧ್ಯಮ ವರ್ಗದ ಕುಟುಂಬದವರು ಜೀವನ ನಡೆಸಲು ಕಷ್ಟಪಡುತ್ತಿದ್ದಾರೆ. ಹೀಗಾಗಿ ಮಾರುಕಟ್ಟೆ ಅಕ್ಕಿ ದರವನ್ನು ನಿಯಂತ್ರಿಸುವ ಸಲುವಾಗಿ ಭಾರತ್ ಅಕ್ಕಿಯನ್ನು ಕೇಂದ್ರ ಸರ್ಕಾರ ಮಾರುಕಟ್ಟೆಗೆ ಬಿಟ್ಟಿದೆ. ದರ ಕಡಿಮೆಯಾದರೂ ಇದು ಕ್ವಾಲಿಟಿ ಅಕ್ಕಿಯಾಗಿರಲಿದೆ ಎಂದು ಹೇಳಲಾಗಿದೆ.

 

ನಾಳೆ ಮಂಡ್ಯದಲ್ಲಿ ಲಭ್ಯ, ಮುಂದಿನ ದಿನಗಳಲ್ಲಿ ಇತರ ಜಿಲ್ಲೆಗೂ ವಿಸ್ತರಣೆ

 

   ಭಾರತ್ ಅಕ್ಕಿ ಇವತ್ತಿನಿಂದ ಬೆಂಗಳೂರಿನಲ್ಲಿ ಸಿಗಲಿದೆ. ಅಕ್ಕಿ ಹೊತ್ತ ವಾಹನಗಳು ನಿಮ್ಮ ಏರಿಯಾಗಳಿಗೆ ಬರಲಿವೆ. ಅಲ್ಲಿ‌‌ ನೀವು ಖರೀದಿ ಮಾಡಬಹುದು. ನಾಳೆ ಮಂಡ್ಯದಲ್ಲೂ ಭಾರತ್ ಅಕ್ಕಿ ಲಭ್ಯವಾಗಲಿದೆ. ಮುಂದಿನ ದಿನಗಳಲ್ಲಿ ಎಲ್ಲಾ ಜಿಲ್ಲೆಗಳಿಗೂ ವಿಸ್ತರಣೆ ಮಾಡಲಾಗುತ್ತದೆ.

 

 Online ನಲ್ಲೂ ಭಾರತ್ ಅಕ್ಕಿ ಅರ್ಡರ್ ಮಾಡಬಹುದು

 

   ಇ-ಕಾಮರ್ಸ್ ವೆಬ್ ಸೈಟ್ ಗಳಲ್ಲೂ ಭಾರತ್ ಅಕ್ಕಿ ಸಿಗಲಿದೆ. ಸದ್ಯಕ್ಕೆ ಫ್ಲಿಪ್ ಕಾರ್ಟ್, ಬಿಗ್ ಬ್ಯಾಸ್ಕೆಟ್, ರಿಲಯನ್ಸ್ ಗಳಲ್ಲಿ ಭಾರತ್ ಬ್ರಾಂಡ್ ಅಕ್ಕಿ ಸಿಗಲಿದೆ. ಎಲ್ಲಾ ಇ ಕಾಮರ್ಸ್ ಆನ್ ಲೈನ್ ವೆಬ್ ಸೈಟ್ ಗಳಲ್ಲೂ ಭಾರತ್ ಬ್ರಾಂಡ್ ಅಕ್ಕಿ ಸಿಗಲಿದೆ.

 

ಇನ್ನೂ ಎಲ್ಲೆಲ್ಲಿ ಸಿಗಲಿದೆ..?

 ರಾಷ್ಟ್ರೀಯ ಕೃಷಿ ಸಹಕಾರ ಮಾರುಕಟ್ಟೆ ಮಹಾಮಂಡಳ (ನಾಫೆಡ್), ರಾಷ್ಟ್ರೀಯ ಸಹಕಾರ ಗ್ರಾಹಕರ ಮಹಾಮಂಡಳ (ಎನ್‌ಸಿಸಿಎಫ್‌) ಮತ್ತು ಕೇಂದ್ರೀಯ ಭಂಡಾರದ ಮಳಿಗೆಗಳಲ್ಲಿ ಕೂಡಾ ಭಾರತ್ ಬ್ರಾಂಡ್ ಅಕ್ಕಿ ಸಿಗಲಿದೆ.