ಕದಿಯಲು ಹೋದ ಮನೆಯಲ್ಲಿ ಖಿಚಡಿ ಮಾಡಲು ಹೋದ ಕಳ್ಳ ಏನಾದ..?

ಗುವಾಹಟಿ: ಅಸ್ಸಾಂನ ಗುವಾಹಟಿಯಲ್ಲಿ ಕಳ್ಳನೊಬ್ಬ ಮನೆಯೊಂದಕ್ಕೆ ನುಗ್ಗಿದ್ದ. ಯಾರೂ ಇಲ್ಲದ ಮನೆಯಲ್ಲಿ ನಗ, ನಾಣ್ಯ ಸೇರಿ ಸಿಕ್ಕಿದ್ದೆಲ್ಲಾ ಗಂಟು ಕಟ್ಟಿದ್ದ. ಅಷ್ಟರಲ್ಲಿ ಆತನಿಗೆ ಹಸಿವಾಗಿದೆ. ಹೀಗಾಗಿ ಕಳ್ಳ ಮನೆಯಲ್ಲಿ ಖಿಚಡಿ ತಯಾರಿಸಿ ತಿನ್ನಲು ಹೋಗಿ ಸಿಕ್ಕಿಬಿದ್ದಿದ್ದಾನೆ.
ಮನೆಯಲ್ಲಿ ಯಾರೂ ಇಲ್ಲದ್ದನ್ನು ನೋಡಿಯೇ ಆತ ಆ ಮನೆಗೆ ನುಗ್ಗಿದ್ದ. ಯಾರೂ ಇಲ್ಲದ ಕಾರಣ ಆರಾಮಾಗಿ ಅಡುಗೆ ತಯಾರಿಸಿ ತಿಂದು ಹೋಗೋಣ ಎಂದು ಆತ ತೀರ್ಮಾನಿಸಿದ್ದ. ಆದರೆ ಅಕ್ಕಪಕ್ಕದ ಮನೆಯವರಿಗೆ ಅಡುಗೆ ತಯಾರಿಯ ಸದ್ದು ಕೇಳಿಸಿದೆ. ಮನೆಯವರು ಊರಿಗೆ ಹೋಗಿದ್ದಾರೆ. ಯಾರು ಆ ಮನೆಯಲ್ಲಿ ಅಡುಗೆ ಮಾಡುತ್ತಿದ್ದಾರೆ ಎಂಬ ಅನುಮಾನ ಬಂದಿದೆ. ಕೂಡಲೇ ಪೊಲೀಸರಿಗೆ ಸುದ್ದಿ ಮುಟ್ಟಿಸಿದ್ದಾರೆ. ತಕ್ಷಣ ಬಂದ ಪೊಲೀಸರು ಕಳ್ಳನನ್ನು ಹಿಡಿದು ಬೇಡಿ ತೊಡಿಸಿದ್ದಾರೆ.