ಹಾಸನದಲ್ಲಿ ಜೆಡಿಎಸ್‌ ಭರ್ಜರಿ ರೋಡ್‌ ಶೋ; ದೇವೇಗೌಡರ ಇಡೀ ಕುಟುಂಬ ಭಾಗಿ
ಹಾಸನ; ಹಾಸನ ಟಿಕೆಟ್‌ ವಿಚಾರದಲ್ಲಿ ಇಷ್ಟು ದಿನ ಒಬ್ಬರಿಗೊಬ್ಬರು ಮುನಿಸಿಕೊಂಡಿದ್ದ ದೇವೇಗೌಡರ ಕುಟುಂಬದ ಸದಸ್ಯರು ಈಗ ಒಂದಾಗಿದ್ದಾರೆ. ನಿನ್ನೆಯಷ್ಟೇ ಸ್ವರೂಪ್‌ ನಾಮಪತ್ರ ಸಲ್ಲಿಕೆ ಕಾರ್ಯಕ್ರಮದಲ್ಲಿ ರೇವಣ್ಣ ಕುಟುಂಬ ಪಾಲ್ಗೊಂಡಿತ್ತು. ಇದೇ ವೇಳೆ ಭವಾನಿ ರೇವಣ್ಣ ಅವರು ಮಾತನಾಡಿ, ಸ್ವರೂಪ್‌ ನನ್ನ ಮಗನಿದ್ದಂತೆ ಎಂದು ಹೇಳಿದ್ದರು. ಇವತ್ತು ಸ್ವರೂಪ್‌ ಪರ ಪ್ರಚಾರ ರ್ಯಾಲಿ ನಡೆಸಿದ್ದು, ದೇವೇಗೌಡರ ಇಡೀ ಕುಟುಂಬ ಇದರಲ್ಲಿ ಪಾಲ್ಗೊಂಡಿತ್ತು.
ರೇವಣ್ಣ ಅವರ ಕುಟುಂಬ, ಹೆಚ್‌.ಡಿ.ಕುಮಾರಸ್ವಾಮಿಯವರ ಕುಟುಂಬ ಹಾಗೂ ದೇವೇಗೌಡರು ಈ ರ್ಯಾಲಿಯಲ್ಲಿ ಪಾಲ್ಗೊಂಡಿದ್ದರು. ಹಾಸನದಲ್ಲಿ ನಡೆದ ಬೃಹತ್‌ ಮೆರವಣಿಗೆಯಲ್ಲಿ ಸಾವಿರ ಸಾವಿರ ಸಂಖ್ಯೆಯಲ್ಲಿ ಜನರು ಸೇರಿದ್ದರು. ಇದೇ ವೇಳೆ ಮಾತನಾಡಿದ ಮಾಜಿ ಪ್ರಧಾನಿ ದೇವೇಗೌಡರು, ನಮ್ಮ ಕುಟುಂಬ ಯಾರಿಗೂ ಮೋಸ ಮಾಡಿಲ್ಲ. ಹಾಸನದಲ್ಲಿ ಸ್ವರೂಪ್‌ ಗೆಲ್ಲಬೇಕು, ಪ್ರೀತಂ ಗೌಡ ಸೋಲಬೇಕು ಎಂದು ಹೇಳಿದರು.
ಮುಸ್ಲಿಮರಿಗೆ ನಾನು 4 ಪರ್ಸೆಂಟ್‌ ಮೀಸಲಾತಿ ನೀಡಿದ್ದೆ. ಅದನ್ನು ಈಗ ತೆಗೆದು ಹಾಕಲಾಗಿದೆ. ಜೆಡಿಎಸ್‌ ಅಧಿಕಾರಕ್ಕೆ ಬಂದರೆ ಮತ್ತೆ 2ಬಿ ಮೀಸಲಾತಿ ನೀಡೋದಾಗಿ ದೇವೇಗೌಡರು ಭರವಸೆ ನೀಡಿದರು.
