ಬನ್ರೋ ಯಾರ್‌ ಬರ್ತೀರೋ ಬನ್ನಿ, ಯಾವ ಮೀಸೆಗೂ ಹೆದರಲ್ಲ; ಬಿಜೆಪಿಗೆ ಪರಮೇಶ್ವರ್‌ ಸವಾಲ್‌
ತುಮಕೂರು; ಐಎಎಸ್‌ ಅಧಿಕಾರಿ ಅನಿಲ್ ಕುಮಾರ್ ಅವರು ಕೊರಟಗೆರೆ ಬಿಜೆಪಿ ಟಿಕೆಟ್‌ ಆಕಾಂಕ್ಷಿಯಾಗಿದ್ದಾರೆ. ನಿವೃತ್ತಿ ಕೆಲವೇ ದಿನ ಬಾಕಿ ಉಳಿದಿರುವುದರಿಂದ ಅವರು ರಾಜಕೀಯ ಅಖಾಡಕ್ಕಿಳಿಯಲು ಪ್ರಯತ್ನಿಸುತ್ತಿದ್ದಾರೆ. ಅನಿಲ್ ಕುಮಾರ್ ಅವರ ಆಗಮನ ಹಾಲಿ ಶಾಸಕ ಡಾ.ಜಿ.ಪರಮೇಶ್ವರ್‌ ರ ನೆತ್ತಿ ಬಿಸಿ ಮಾಡಿದಂತೆ ಕಾಣುತ್ತಿದೆ. ಕಾರ್ಯಕ್ರಮವೊಂದರಲ್ಲಿ ಅವರು ಕಿರುಚಾಡಿರುವುದು ಇದಕ್ಕೆ ಸಾಕ್ಷಿ.
ಕೊರಟಗೆರೆ ಪಟ್ಟಣದ ಮಾರುತಿ ಕಲ್ಯಾಣ ಮಂಟಪದಲ್ಲಿ ಕಾಂಗ್ರೆಸ್‌ ಬೆಂಬಲಿತ ಒಕ್ಕಲಿಗ ಮುಖಂಡರ ಸಭೆ ನಡೆಸಲಾಯ್ತು. ಈ ವೇಳೆ ಪರಮೇಶ್ವರ್‌ ಅವರು ಭಾಷಣದಲ್ಲಿ ಅಬ್ಬರಿಸಿದ್ದಾರೆ. ಬನ್ರೋ ನನ್ ಮಕ್ಳಾ ಯಾರು ಬರ್ತೀರೋ ಬನ್ನಿ ಎಂದು ಪರಮೇಶ್ವರ್‌ ಸವಾಲು ಎಸೆದಿದ್ದಾರೆ. ಯಾವ ಮೀಸೆನೂ ಇಲ್ಲ, ಏನೂ ಇಲ್ಲ, ನಾನು ಯಾರಿಗೂ ಹೆದರೋ ವ್ಯಕ್ತಿ ಅಲ್ಲ ಎನ್ನುವ ಮೂಲಕ ಪರೋಕ್ಷವಾಗಿ ಬಿಜೆಪಿಯ ಅನಿಲ್ ಕುಮಾರ್‌ಗೆ ಸವಾಲು ಹಾಕಿದ್ದಾರೆ. ತುಂಬಾ ಜನ ಬೆಂಗಳೂರಿನಲ್ಲಿ ಸ್ಪರ್ಧೆ ಮಾಡಿ ಅಂತ ಕರೆಯುತ್ತಿದ್ದಾರೆ. ಆದ್ರೆ ನಾನು ಕೊರಟಗೆರೆಯಲ್ಲೇ ಸ್ಪರ್ಧೆ ಮಾಡ್ತೀನಿ, ಗೆಲ್ತೀನಿ ಅಂತ ಪರಮೇಶ್ವರ್‌ ಹೇಳಿದರು.
ಮೊನ್ನೆಯಷ್ಟೇ ಬಿ.ವೈ ವಿಜಯೇಂದ್ರ, ತೇಜಸ್ವಿ ಸೂರ್ಯ ಅವರನ್ನು ಕರೆತಂದು ಅನಿಲ್ ಕುಮಾರ್ ಅವರು ಕೊರಟಗೆರೆಯಲ್ಲಿ ರ್ಯಾಲಿ ನಡೆಸಿದ್ದರು. ಇದರಿಂದಾಗಿ ಕೆರಳಿರುವ ಪರಮೇಶ್ವರ್‌, ವಾಗ್ದಾಳಿ ನಡೆಸಿದ್ದಾರೆ.
