ಕೊರೋನಾದಿಂದ ಚೀನಾದಲ್ಲಿ ಜನರ ಚೀರಾಟ; ಮತ್ತೆ ಕಾಡ್ತಿದೆ ಮಹಾಮಾರಿ

ಬೀಜಿಂಗ್(ಚೀನಾ): ಕೊರೊನಾ ಸೋಂಕು ಚೀನಾದಲ್ಲಿ ಈಗ ಜೋರಾಗಿ ಆರ್ಭಟ ಶುರು ಮಾಡಿದೆ. ಶೂನ್ಯ ಕೋವಿಡ್ ನಿಯಮವನ್ನು ಅನುಸರಿಸಿರುವ ಚೀನಾ ಕೆಲವು ಪ್ರಮುಖ ನಗರಗಳಲ್ಲಿ ಕಠಿಣ ಲಾಕ್​ಡೌನ್ ಜಾರಿ ಮಾಡಿದೆ.  ಚೀನಾದ ಅತಿ ದೊಡ್ಡ ವಾಣಿಜ್ಯ ನಗರಗಳಲ್ಲಿ ಒಂದಾದ ಶಾಂಘೈನಲ್ಲೂ ಅತ್ಯಂತ ಕಠಿಣ ಲಾಕ್​ಡೌನ್​​ ನಿಯಮಗಳನ್ನು ಜಾರಿ ಮಾಡಲಾಗಿದೆ. ಜನರು ಕಟ್ಟಡಗಳಿಂದ ಹೊರಬರಲು ಬಿಡುತ್ತಿಲ್ಲ. ಈ ಕಾರಣಕ್ಕಾಗಿ ಹಾಹಾಕಾರ ಶುರುವಾಗಿದೆ. ಜನರು ಅನುಭವಿಸುತ್ತಿರುವ ಸಂಕಷ್ಟದ ವಿಡಿಯೋಗಳು ಈಗ ಎಲ್ಲೆಡೆ ವೈರಲ್‌ ಆಗುತ್ತಿವೆ. ಅವುಗಳನ್ನು ನೋಡಿದರೆ ಎದೆನಡುಕ ಶುರುವಾಗುತ್ತದೆ.

   ಪ್ಯಾಟ್ರಿಕ್ ಮ್ಯಾಡ್ರಿಡ್ ಎಂಬುವವರು ವಿಡಿಯೋವೊಂದನ್ನು ಟ್ವೀಟ್ ಮಾಡಿದ್ದು, ಲಾಕ್​ಡೌನ್​ನಲ್ಲಿ ಶಾಂಘೈನಲ್ಲಿ ಜನರು ಕಟ್ಟಡಗಳಲ್ಲಿ ನಿರ್ಬಂಧಿಸಲಾಗಿದೆ. ಜನರು ಕಟ್ಟಡಗಳಿಂದ ಕಿರುಚುತ್ತಿದ್ದಾರೆ. ಸಹಾಯಕ್ಕಾಗಿ ಕೂಗುವುದು ಮಾತ್ರವಲ್ಲದೇ, ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅವರು ಕಟ್ಟಡಗಳಿಂದ ಹೊರಗೆ ಬರಲು ಸಾಧ್ಯವೇ ಇಲ್ಲದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಚೀನಾದಲ್ಲಿ ಕೊರೊನಾ ಸೋಂಕು ಸೃಷ್ಟಿಸಿರುವ ಸನ್ನಿವೇಶವನ್ನು ಉಲ್ಲೇಖಿಸಿದ್ದಾರೆ.