ಬಾಲಿವುಡ್ ಖ್ಯಾತ ಕಲಾನಿರ್ದೇಶಕ ನಿತಿನ್ ದೇಸಾಯಿ ಆತ್ಮಹತ್ಯೆ
ಮುಂಬೈ; ಬಾಲಿವುಡ್ನ ಖ್ಯಾತ ಕಲಾ ನಿರ್ದೇಶಕ ನಿತಿನ್ ದೇಸಾಯಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಇಂದು ಮುಂಜಾನೆ ಅವರು ಮುಂಬೈನಲ್ಲಿ ನೇಣುಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಅವರದ್ದೇ ಮಾಲೀಕತ್ವದ ಎನ್‌ಡಿ ಸ್ಟುಡಿಯೋದಲ್ಲೇ ಅವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ನಿತಿನ್ ದೇಸಾಯಿ ಅವರು ಇದೇ ಆಗಸ್ಟ್‌ 9ರಂದು ಹುಟ್ಟುಹಬ್ಬ ಆಚರಿಸಿಕೊಳ್ಳಬೇಕಿತ್ತು. ಆದ್ರೆ ಹುಟ್ಟುಹಬ್ಬಕ್ಕೂ ಏಳು ದಿನ ಮೊದಲು ಇಹಲೋಕ ತ್ಯಜಿಸಿದ್ದಾರೆ. ‘ಹಮ್ ದಿಲ್ ದೇ ಚುಕೆ ಸನಮ್’, ‘ದೇವದಾಸ್’, ‘ಜೋಧಾ ಅಕ್ಬರ್’ ಹಾಗೂ ‘ಲಗಾನ್’ ಸೇರಿ ಹಲವಾರು ಹಿಟ್‌ ಚಿತ್ರಗಳಿಗೆ ನಿತಿನ್ ದೇಸಾಯಿ ಅವರು ಕಲಾ ನಿರ್ದೇಶಕರಾಗಿದ್ದರು. ಬಾಲಿವುಡ್‌ನಲ್ಲಿ ದೊಡ್ಡ ಮಟ್ಟದ ಹೆಸರು ಗಳಿಸಿದ್ದ ದೇಸಾಯಿಯವರು ನಾಲ್ಕು ರಾಷ್ಟ್ರ ಪ್ರಶಸ್ತಿಗಳನ್ನೂ ಮುಡಿಗೇರಿಸಿಕೊಂಡಿದ್ದರು.
ಆದ್ರೆ ಇದ್ದಕ್ಕಿದ್ದಂತೆ ಅವರು ಯಾಕೆ ಆತ್ಮಹತ್ಯೆ ಮಾಡಿಕೊಂಡರು ಅನ್ನೋದು ಗೊತ್ತಾಗುತ್ತಿಲ್ಲ. ಯಾವ ವಿಚಾರ ಅವರ ಮನಸ್ಸಿಗೆ ನೋವಾಯಿತು ಅನ್ನೋದೇ ಯಾರಿಗೂ ತಿಳಿದಿಲ್ಲ. ನಿತಿನ್ ಅವರು ಚಿತ್ರ ನಿರ್ಮಾಪಕ ಹಾಗೂ ನಿರ್ದೇಶಕರಾಗಿಯೂ ಗುರುತಿಸಿಕೊಂಡಿದ್ದರು.
