50 ಚೀಲ ಗೋಧಿ ಕೆರೆ ಬಳಿ ಎಸೆದಿದ್ದು ಯಾರು..?; ಇದು ಯಾರಿಗೆ ಸೇರಿದ್ದು..?

ಚಿತ್ರದುರ್ಗ; ಸುಮಾರು ಐವತ್ತಕ್ಕೂ ಹೆಚ್ಚು ಗೋಧಿ ಚೀಲಗಳನ್ನು ಯಾರೋ ಅನಾಮಿಕರು ಕರೆಯೊಂದರ ಕೋಡಿ ಬಳಿ ಎಸೆದುಹೋಗಿದ್ದಾರೆ. ಗೋದಿಗೆ ಹುಳ ಬಿದ್ದಿದ್ದರಿಂದ ಪಡಿತರಕ್ಕೆ ವಿತರಣೆ ಮಾಡಬೇಕಾಗಿದ್ದ ಗೋಧಿ ಹೀಗೆ ಎಸೆದಿರಬಹುದು ಎಂದು ಶಂಕಿಸಲಾಗಿದೆ. ಚಿತ್ರದುರ್ಗ ಜಿಲ್ಲೆಯ ಹೊಳಲ್ಕೆರೆ ಪಟ್ಟಣದ ಹೊರವಲಯದಲ್ಲಿರುವ ಕೆರೆ ಕೋಡಿಯ ಬಳಿ ಈ ಮೂಟೆಗಳು ಸಿಕ್ಕಿವೆ. 

ಹೊಳಲ್ಕೆರೆಯ ಅವಳಿ ಜಟ್ಟಿ ರಸ್ತೆಯ ಕೆಸರುಕಟ್ಟೆ ಕೆರೆಯ ಕೋಡಿ ಬಿದ್ದ ಜಾಗದ ಸೇತುವೆಯ ಕೆಳಭಾಗದಲ್ಲಿ ಈ ಚೀಲಗಳು ಪತ್ತೆಯಾಗಿವೆ. ಆದ್ರೆ ಯಾರು ಇಲ್ಲಿ ಈ ಚೀಲಗಳನ್ನು ಹಾಕಿ ಹೋಗಿದ್ದಾರೆ ಅನ್ನೋದು ಗೊತ್ತಾಗಿಲ್ಲ. ಪಡಿತರ ಕಾರ್ಡ್‌ ದಾರರಿಗೆ ವಿತರಣೆ ಮಾಡಲು ತಂದಿದ್‌ ಗೋಧಿಗೆ ಹುಳ ಹಿಡಿದಿದ್ದರಿಂದ ಗೋಡೌನ್‌ನಿಂದ ತಂದು ಹೀಗೆ ಬಿಸಾಡಿರಬಹುದು ಎಂದು ಹೇಳಲಾಗುತ್ತಿದೆ.

ಇಂದು ಮುಂಜಾನೆ ಪಕ್ಕದ ಜಮೀನು ಮಾಲೀಕ ಮಂಜುನಾಥ್‌ಗೆ ಈ ಮೂಟೆಗಳು ಕಾಣಿಸಿವೆ. ಜಾನುವಾರುಗಳು ಇವುಗಳನ್ನು ತಿಂದು ಏನಾದರೂ ಎಡವಟ್ಟಾದರೆ ಯಾರು ಗತಿ ಎಂದು ರೈತ ಪ್ರಶ್ನೆ ಮಾಡಿದ್ದಾರೆ.