ಕಸ ಗುಡಿಸುತ್ತಿದ್ದ ಮಹಿಳೆ ಮೇಲೆ ಹರಿದ ಕಾರು; ಚಾಲಕನಿಗೆ ಧರ್ಮದೇಟು

ಬೆಳಗಾವಿ‌; ಬೆಳ್ಳಂಬೆಳಗ್ಗೆ ಎಲ್‌ಐಸಿ ಕಚೇರಿ ಆವರಣದಲ್ಲಿ ಕಸ ಗುಡಿಸುತ್ತಿದ್ದ ಮಹಿಳೆ ಮೇಲೆ ಕಾರು ಹರಿದಿದ್ದು, ಮಹಿಳೆ ಸ್ಥಳದಲ್ಲೇ ಸಾವನ್ನಪ್ಪಿರುವ ದಾರುಣ ಘಟನೆ ಬೆಳಗಾವಿಯ ಬಸವೇಶ್ವರ ವೃತ್ತದ ಬಳಿ ನಡೆದಿದೆ.  ಚಾಲಕನನ್ನು ಹಿಡಿದ ಸಾರ್ವಜನಿಕರು ಹಿಗ್ಗಾಮುಗ್ಗಾ ಥಳಿಸಿದ್ದಾರೆ.

ಟಿಳಕವಾಡಿಯ ಪಿ.ಕೆ.ಕ್ವಾಟರ್ಸ್ ನಿವಾಸಿ ಅನಿತಾ ರಾಜೇಶ ಬನ್ಸ್ (52) ಕಾರು ಅಪಘಾತದಲ್ಲಿ ಸಾವನ್ನಪ್ಪಿದವರು ಎಂದು ತಿಳಿದುಬಂದಿದೆ.  ಅನಿತಾ ಅವರು ಎಂದಿನಂತೆ ಎಲ್ಐಸಿ ಕಚೇರಿ ಆವರಣವನ್ನು ಶುಚಿಗೊಳಿಸುತ್ತಿದ್ದರು. ಇದೇ ಸಂದರ್ಭದಲ್ಲಿ ಗುರುರಾಜ ಕುಲಕರ್ಣಿ ಎನ್ನುವವರು ಎಲ್ಐಸಿ ಆವರಣದಲ್ಲಿದ್ದ ಕಾರು ಹೊರತಗೆಯುವಾಗ ಅನಿತಾ ಅವರಿಗೆ ಡಿಕ್ಕಿ ಹೊಡೆದಿದ್ದಾರೆ. ಕಾರು ವೇಗವಾಗಿ ಗುದ್ದಿದ್ದರಿಂದ ಮಹಿಳೆ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಕಾರಿನ ಒಂದು ಭಾಗ ಕೂಡಾ ನಜ್ಜುಗುಜ್ಜಾಗಿದೆ.