ಶಾಸಕನ ಎದುರೇ ವ್ಯಕ್ತಿಯನ್ನು ಅಟ್ಟಾಡಿಸಿ ಹೊಡೆದ ನಗರಸಭಾ ಸದಸ್ಯ..!
ಮೈಸೂರು: ಶಾಸಕರಿಗೆ ಸಮಸ್ಯೆ ಹೇಳಲು ಬಂದ ಸ್ಥಳೀಯ ಮುಖಂಡನನ್ನು ಶಾಸಕರ ಮುಂದೆಯೇ ನಗರಸಭಾ ಸದಸ್ಯನೊಬ್ಬ ಅಟ್ಟಾಡಿಸಿ ಹೊಡೆದ ಘಟನೆ ನಂಜನಗೂಡು ಪಟ್ಟನದಲ್ಲಿ ನಡೆದಿದೆ. ನಂಜನಗೂಡು ಬಿಜೆಪಿ ಶಾಸಕ ಹರ್ಷವರ್ದನ್‌ ಅವರು, ಬಾಲಕಿಯರ ಪದವಿ ಪೂರ್ವ ಕಾಲೇಜಿಗೆ ಆಗಮಿಸಿದ್ದರು. ಈ ವೇಳೆ ಸ್ಥಳೀಯ ಮುಖಂಡ ಪುಟ್ಟಸ್ವಾಮಿ ಎಂಬುವವರು ಶಾಸಕ ಹರ್ಷವರ್ದನ್‌ಗೆ ಸಮಸ್ಯೆ ಹೇಳಲು ಬಂದರು. ಇದನ್ನು ನೋಡಿದ ನಗರಸಭಾ ಸದಸ್ಯ ಕಪಿಲೇಶ್‌ ಹಾಗೂ ಆತನ ಬೆಂಬಲಿಗರು, ಪುಟ್ಟಸ್ವಾಮಿ ಮೇಲೆ ಹಲ್ಲೆ ಮಾಡಿದ್ದಾರೆ.
ಕಪಿಲೇಶ್‌ ಹಾಗೂ ಬೆಂಬಲಿಗರು ಪುಟ್ಟಸ್ವಾಮಿಯನ್ನು ಶಾಸಕರ ಮುಂದೆಯೇ ಎಳೆದಾಡಿ, ಹಿಗ್ಗಾಮುಗ್ಗಾ ಹೊಡೆದಿದ್ದಾರೆ. ಶಾಸಕರು ಕೂಡಾ ಜಗಳ ಬಿಡಿಸುವ ಬದಲು ಅಲ್ಲಿಂದ ಕಾಲ್ಕಿತ್ತಿದ್ದಾರೆ. ಪುಟ್ಟಸ್ವಾಮಿ ಕೂಡಾ ಏಟು ತಿಂದು ಅಲ್ಲಿಂದ ಕಾರಿನಲ್ಲಿ ಹೊರಟುಹೋಗಿದ್ದಾರೆ. ಆದರೆ ಈ ಬಗ್ಗೆ ದೂರು ದಾಖಲಾದ ಬಗ್ಗೆ ವರದಿಯಾಗಿಲ್ಲ. ಆದರೆ, ಹಲ್ಲೆ ಮಾಡುತ್ತಿರುವ ವಿಡಿಯೋ ಮಾತ್ರ ಎಲ್ಲೆಡೆ ವೈರಲ್‌ ಆಗುತ್ತಿದೆ.
