Lal Salaam; ಫೆಬ್ರವರಿ 9ಕ್ಕೆ ʻಲಾಲ್‌ ಸಲಾಮ್‌ʼ ಎನ್ನಲಿದ್ದಾರೆ ಸೂಪರ್‌ ಸ್ಟಾರ್‌ ರಜನಿಕಾಂತ್‌
ಬೆಂಗಳೂರು; ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅಭಿನಯದ ಚಿತ್ರ ಅಂದ್ರೆ ಅದಕ್ಕೊಂದು ರೇಂಜ್‌ ಇರುತ್ತೆ. ಅವರ ಸಿನಿಮಾ ಬರ್ತಿದೆ ಅಂದ್ರೆ ಲಕ್ಷಾಂತರ ಅಭಿಮಾನಿಗಳು ಕಾದುಕುಳಿತಿರುತ್ತಾರೆ. ವಯಸ್ಸಾಗಿದ್ದರಿಂದ ರಜಿನಿಕಾಂತ್‌ ಅವರ ಚಿತ್ರಗಳು ಸೆಟ್ಟೇರೋದು ಕಡಿಮೆ. ಆಗೊಂದು ಈಗೊಂದು ತೆರೆಗೆ ಅಪ್ಪಳಿಸುತ್ತಿರುತ್ತದೆ. ಹಾಗೆ ಅವರು ನಟನೆ ʻಲಾಲ್‌ ಸಲಾಮ್‌ʼ (Lal salam) ಚಿತ್ರ ಕಳೆದ ವರ್ಷವೇ ತೆರೆಗೆ ಬರಬೇಕಿತ್ತು. ಆದ್ರೆ ಸಾಕಷ್ಟು ತಡವಾಗಿದೆ. ತಡವಾಗಿಯಾದರೂ ಸಾಕಷ್ಟು ಸದ್ದು ಮಾಡುತ್ತಲೇ ತೆರೆಗೆ ಬರುತ್ತಿದೆ. ಈಗಾಗಲೇ ಟ್ರೇಲರ್‌ ರಿಲೀಸ್‌ ಆಗಿದ್ದು, ಫೆಬ್ರವರಿ 9ಕ್ಕೆ ಚಿತ್ರ ತೆರೆ ಕಾಣೋದಕ್ಕೆ ರೆಡಿಯಾಗಿದೆ. ಅಂದ್ರೆ ಇನ್ನು ಮೂರೇ ದಿನದಲ್ಲಿ ʻಲಾಲ್‌ ಸಲಾಮ್‌ʼ ಅಂತ ಅಬ್ಬರಿಸಲಿದ್ದಾರೆ ರಜಿನಿಕಾಂತ್‌ (Rajinikanth).
ರಜನಿಕಾಂತ್‌ ಪುತ್ರಿ ಐಶ್ವರ್ಯಾ ನಿರ್ದೇಶನದ ಚಿತ್ರ
ಈ ಚಿತ್ರದ ವಿಶೇಷತೆ ಏನು ಅಂದ್ರೆ, ನಿರ್ದೇಶನ ಮಾಡಿರೋದು ಸ್ವತಃ ರಜಿನಿಕಾಂತ್‌ ಪುತ್ರಿ ಐಶ್ವರ್ಯಾ. ಸಂಕ್ರಾಂತಿ ಹಬ್ಬದಂದೇ ಈ ಚಿತ್ರ ತೆರೆಗೆ ಬರಬೇಕಾಗಿತ್ತು. ಆದ್ರೆ, ಹಲವು ಕಾರಣಗಳಿಗಾಗಿ ಬಿಡುಗಡೆಯಾಗಲಿಲ್ಲ. ಈಗ ಫೆಬ್ರವರಿ 9ಕ್ಕೆ ತೆರೆಗೆ ಬರಲು ಲಾಲ್‌ ಸಲಾಮ್‌ ಸಿದ್ಧವಾಗಿದೆ. ವಿಷ್ಣು ವಿಶಾಲ್, ವಿಕ್ರಾಂತ್ ಸೇರಿ ಹಲವು ಕಲಾವಿದರು ಈ ಸಿನಿಮಾಗಾಗಿ ಬಣ್ಣ ಹಚ್ಚಿದ್ದಾರೆ.
ಸಮಾನತೆಯೇ ಈ ಚಿತ್ರದ ಮೂಲಮಂತ್ರವಾಗಿದೆ
ಲಾಲ್‌ ಸಲಾಂ ಚಿತ್ರ ಸಮಾನತೆ ಮಂತ್ರವನ್ನು ಪಠಿಸುತ್ತದೆ. ಈಗಾಗಲೇ ಟ್ರೈಲರ್‌ನಲ್ಲಿರುವ ಡೈಲಾಗ್‌ಗಳೇ ಸಾಕಷ್ಟು ಸದ್ದು ಮಾಡುತ್ತಿವೆ. ‘ಜನರು ಯಾವ ದೇವರ ಮೇಲೆ ನಂಬಿಕೆ ಇಡುತ್ತಾರೆ ಎಂಬುದು ಮುಖ್ಯವಲ್ಲ. ಎಲ್ಲ ದೇವರೂ ಒಂದೇ’ ಹೀಗೆ ಹಲವಾರು ಡೈಲಾಗ್‌ಗಳು ಜನರನ್ನು ಆಕರ್ಷಿಸುತ್ತಿವೆ. ಕ್ರಿಕೆಟ್‌ ಆಟವನ್ನು ಕೇಂದ್ರವಾಗಿಟ್ಟುಕೊಂಡು ಈ ಮೂಲಕ ಸಮಾನತೆ ಮಂತ್ರವನ್ನು ಪಠಿಸಲಾಗಿದೆ.
