ವಿಸಿ ನಾಲೆಗೆ ಬಿದ್ದ ಕಾರು; ಕಾರಿನ ಚಾಲಕ ನಾಪತ್ತೆ

ಮಂಡ್ಯ; ವಿಸಿ ನಾಲೆಗೆ ಕಾರೊಂದು ಬಿದ್ದಿದ್ದು, ಚಾಲಕ ನಾಪತ್ತೆಯಾಗಿದ್ದಾನೆ. ಆತನಿಗಾಗಿ ತೀವ್ರ ಹುಡುಕಾಟ ನಡೆಸಲಾಗುತ್ತಿದೆ. ಮಂಡ್ಯ ಬಳಿಯ ತಿಬ್ಬನಹಳ್ಳಿ ಬಳಿ ಈ ದುರ್ಘಟನೆ ನಡೆದಿದೆ. ನಾಲೆಗೆ ತಡೆಗೋಡೆ ಇಲ್ಲ. ಹೀಗಾಗಿ ಈ ನಾಲೆಯ ಪಕ್ಕದಲ್ಲೇ ಇದ್ದ ರಸ್ತೆಯಲ್ಲಿ ಬರುತ್ತಿದ್ದಾಗ ಕಾರು ಚಾಲಕನ ನಿಯಂತ್ರಣ ತಪ್ಪಿದೆ. ಈ ವೇಳೆ ನೇರವಾಗಿ ಕಾರು ನಾಲೆಗೆ ಪಲ್ಟಿ ಹೊಡೆದಿದೆ.

ಲೋಕೇಶ್‌ ಎಂಬುವವರೇ ನಾಪತ್ತೆಯಾಗಿರುವ ಚಾಲಕ. ಮಳೆಯಿಂದಾಗಿ ನಾಲೆಯಲ್ಲಿ ಹೆಚ್ಚಾಗಿ ನೀರು ಹರಿಯುತ್ತಿದೆ. ಹೀಗಾಗಿ ಕಾರು ಕೂಡಾ ಸಂಪೂರ್ಣವಾಗಿ ಮುಳಗಡೆಯಾಗಿದೆ. ಕಾರಿನಲ್ಲಿ ಮತ್ತೊಬ್ಬ ವ್ಯಕ್ತಿ ಇದ್ದು, ಆತ ಬದುಕಿ ಬಂದಿದ್ದಾನೆ. ಆದ್ರೆ ಚಾಲಕ ಮಾತ್ರ ಸಿಕ್ಕಿಲ್ಲ. ಹೀಗಾಗಿ ಲೋಕೇಶ್‌ಗಾಗಿ ಶೋಧಕಾರ್ಯ ಮುಂದುವರೆದಿದೆ. ಸ್ಥಳೀಯರು ಕೂಡಾ ಶೋಧ ಕಾರ್ಯಕ್ಕೆ ಸಾಥ್‌ ನೀಡುತ್ತಿದ್ದಾರೆ.