ಮನೆಗೆ ನುಗ್ಗಿ ನಗ ನಾಣ್ಯ ದೋಚಿದ ಕಳ್ಳರು

ತುಮಕೂರು; ಮನೆಯಲ್ಲಿ ಯಾರೂ ಇಲ್ಲದನ್ನು ಅರಿತ ಕಳ್ಳರು ಮನೆಯಲ್ಲಿದ್ದ ನಗ ನಾಣ್ಯಗಳನ್ನು ದೋಚಿದ ಘಟನೆ ತುರುವೇಕೆರೆ ಪಟ್ಟಣದ ಮುತ್ತುರಾಯನಗರ ಬಡಾವಣೆಯಲ್ಲಿ ನಡೆದಿದೆ.

ಮಂಜುಳಾ ಆನಂದ್ ಎನ್ನುವರ ಮನೆ ಕಳ್ಳತನವಾಗಿದ್ದು, ಇವರು ಕಳೆದ ಎರಡು ದಿನದ ಹಿಂದೆ ಊರಿಗೆ ಹೋಗಿದ್ದರು. ಈ ಸಮಯಕ್ಕಾಗಿಯೇ ಕಾದು ಕುಳಿತ ಕಳ್ಳರು ನಿನ್ನೆ ರಾತ್ರಿ
ಮನೆಯ ಕಿಟಕಿ ದ್ವಾರದಿಂದ ಮುಖ್ಯದ್ವಾರದ ಬೀಗ ತೆಗೆದು ಕಳ್ಳತನ ಮಾಡಿದ್ದಾರೆ. 110 ಗ್ರಾಂ ಚಿನ್ನ, ಒಂದು ಕೆಜಿ ಬೆಳ್ಳಿ, 2 ಲಕ್ಷ 70 ಸಾವಿರ ರೂ ನಗದು ದೋಚಿ ಪರಾರಿಯಾಗಿದ್ದಾರೆ.

ಇಂದು ಬೆಳಗ್ಗೆ ಮನೆಯೊಡತಿ ಮಂಜುಳಾ ವಾಪಸ್ ಬಂದಾಗ ಪ್ರಕರಣ ಬೆಳಕಿಗೆ ಬಂದಿದೆ. ಈ ಸಂಬಂಧ ತುರುವೇಕೆರೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಕಳ್ಳರಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.