ಪರೀಕ್ಷೆಗೆ ಗೈರು ಹಾಜರಾದ ಅಲ್ಲಾ ಹು ಅಕ್ಬರ್‌ ಘೋಷಣೆ ಕೂಗಿದ್ದ ಮುಸ್ಕಾನ್‌
ಮಂಡ್ಯ: ಹಿಜಾಬ್‌ ಹೋರಾಟದ ವೇಳೆ ಅಲ್ಲಾ ಹು ಅಕ್ಬರ್‌ ಎಂದು ಕೂಗಿ ದೇಶಾದ್ಯಂತ ಪ್ರಚಾರ ಪಡೆದುಕೊಂಡಿದ್ದ ಮಂಡ್ಯದ ವಿದ್ಯಾರ್ಥಿನಿ ಮುಸ್ಕಾನ್‌ ಇಂದು ಪರೀಕ್ಷೆಗೆ ಗೈರು ಹಾಜರಾಗಿದ್ದಾಳೆ. ಮುಸ್ಕಾನ್‌ ಎರಡನೇ ವರ್ಷ ಬಿಕಾಂ ವಿದ್ಯಾರ್ಥಿನಿಯಾಗಿದ್ದು, ಇಂದು ಮೂರನೇ ಸೆಮಿಸ್ಟರ್‌ ಪರೀಕ್ಷೆ ಬರೆಯಬೇಕಿತ್ತು. ಆದ್ರೆ ಆಕೆ ಪರೀಕ್ಷೆಗೆ ಹಾಜರಾಗಿಲ್ಲ. ಜೊತೆಗೆ ಹಾಲ್‌ ಟಿಕೆಟ್‌ ಕೂಡಾ ತೆಗೆದುಕೊಂಡು ಹೋಗಿಲ್ಲ ಎಂದು ಹೇಳಲಾಗಿದೆ.
ಹಿಜಾಬ್‌ ಹೋರಾಟದ ಸಂದರ್ಭದಲ್ಲಿ ಅಂದರೆ ಫೆಬ್ರವರಿ 8ರಂದು ಪಿಇಎಸ್‌ ಕಾಲೇಜಿನಲ್ಲಿ ಕೆಲ ಹುಡುಗರು ಜೈ ಶ್ರೀರಾಮ್‌ ಎಂದು ಘೋಷಣೆ ಕೂಗಿದ್ದರು. ಹಿಜಾಬ್‌ ಧರಿಸಿ ಮುಸ್ಕಾನ್‌ ಕಾಲೇಜಿಗೆ ಬಂದಿದ್ದಾಗ ಆಕೆಗೆ ಅಡ್ಡಿಪಡಿಸಲು ಹುಡುಗರು ಈ ಘೋಷಣೆ ಕೂಗಿದ್ದರು. ಈ ವೇಳೆ ಮುಸ್ಕಾನ್‌ ಒಬ್ಬಳೇ ದಿಟ್ಟವಾಗಿ ಇದನ್ನು ಎದುರಿಸಿದ್ದಳು. ಜೈ ಶ್ರೀರಾಮ್‌ ಘೋಷಣೆಗೆ ಪ್ರತಿಯಾಗಿ ಮುಸ್ಕಾನ್‌ ಅಲ್ಲಾ ಹು ಅಕ್ಬರ್‌ ಎಂಬ ಘೋಷಣೆ ಕೂಗಿದ್ದಳು. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಮಟ್ಟದಲ್ಲಿ ವೈರಲ್‌ ಆಗಿತ್ತು.
