ಲಖನೌ ಐಪಿಎಲ್ ಸಲಹೆಗಾರರಾಗಿ ಗೌತಮ್ ಗಂಭೀರ್
ಲಖನೌ: ಟೀಂ ಇಂಡಿಯಾ ಮಾಜಿ ಆಟಗಾರ ಗೌತಮ್ ಗಂಭೀರ್, ಲಖನೌ ಐಪಿಎಲ್ ತಂಡದ ಸಲಹೆಗಾರರಾಗಿ ನೇಮಕವಾಗಿದ್ದಾರೆ. ಈ ಒಪ್ಪಂದಕ್ಕೆ ಗೌತಮ್ ಗಂಭೀರ್ ಸಹಿ ಹಾಕಿದ್ದಾರೆ. ಈ ಬಗ್ಗೆ ಸಂಜೀವ್ ಗೋಯೆಂಕಾ ಒಡೆತನದ ಆರ್‌ಪಿಎಸ್‌ಜಿ ಗ್ರೂಪ್ ಮಾಡಿದ ಎರಡನೇ ದೊಡ್ಡ ಘೋಷಣೆ ಇದಾಗಿದೆ.
2016-17ರಲ್ಲಿ ಐಪಿಎಲ್ ಪುಣೆ ತಂಡದ ಫ್ರಾಂಚೈಸಿ ಪಡೆದಿದ್ದ ಕೋಲ್ಕತ್ತಾ ಮೂಲದ ಕಂಪನಿ ಈ ಬಾರಿ 7,090 ಕೋಟಿ ರೂಪಾಯಿಗೆ ಲಖನೌ ಫ್ರಾಂಚೈಸಿ ಪಡೆದುಕೊಂಡಿದೆ. ಇನ್ನೂ ಹೆಸರಿಡದ ಲಖನೌ ತಂಡಕ್ಕೆ ಗೌತಮ್ ಗಂಭೀರ್ ಅವರನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ. ಈ ಬಗ್ಗೆ ಮಾತನಾಡಿರುವ ಗಂಭೀರ್, ಮತ್ತೆ ಐಪಿಎಲ್ ಕಣಕ್ಕೆ ಇಳಿಯುತ್ತಿರುವುದು ಖುಷಿಯಾಗುತ್ತಿದೆ. ಲಖನೌ ತಂಡದ ಸಲಹೆಗಾರರಾಗಿ ನನ್ನನ್ನು ಆಯ್ಕೆ ಮಾಡಿದ್ದಕ್ಕೆ ಡಾ. ಗೋಯೆಂಕಾ ಅವರಿಗೆ ಧನ್ಯವಾದ ಹೇಳುತ್ತೇನೆ ಎಂದಿದ್ದಾರೆ.
