ಸದನದಲ್ಲಿ ಗ್ಯಾರೆಂಟಿ ಗದ್ದಲ; ಬಾವಿಗಿಳಿದು ಬಿಜೆಪಿ ಸದಸ್ಯರ ಗಲಾಟೆ

ಬೆಂಗಳೂರು; ಗ್ಯಾರೆಂಟಿಗಳ ಬಗ್ಗೆ ಚರ್ಚೆ ಮಾಡಲು ಅವಕಾಶ ಮಾಡಿಕೊಡಬೇಕೆಂದು ಆಗ್ರಹಿಸಿ ಬಿಜೆಪಿ ಸದಸ್ಯರು ಪಟ್ಟು ಹಿಡಿದಿದ್ದಾರೆ. ಸ್ಪೀಕರ್‌ ಇದಕ್ಕೆ ಅವಕಾಶ ಕೊಡದಿದ್ದಕ್ಕೆ ಗದ್ದಲ ಶುರುವಾಗಿದ್ದು, ಎರಡೂ ಸದನಗಳನ್ನು 15 ನಿಮಿಷ ಮುಂದೂಡಲಾಗಿದೆ.

ಇದಕ್ಕೂ ಮುನ್ನ ಮಧ್ಯ ಪ್ರವೇಶಿಸಿ ಮಾತನಾಡಿದ ಸಿಎಂ ಸಿದ್ದರಾಮಯ್ಯ, ಬಿಜೆಪಿ ನಾಯಕರು ಮೊದಲು ಮೊಂಡಾಟ ಬಿಡಲಿ ಎಂದು ಹೇಳಿದರು. ಅದಕ್ಕೆ ಮಾಜಿ ಸಿಎಂ ಬೊಮ್ಮಾಯಿ ಮೊಂಡಾಟ ಪದ ಬಳಕೆ ಬಗ್ಗೆ ಆಕ್ಷೇಪ ಎತ್ತಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಿಎಂ ಸಿದ್ದರಾಮಯ್ಯ, ಮೊಂಡಾಟ ಅಸಾಂವಿಧಾನಿಕ ಪದ ಅಲ್ಲ ಎಂದರು. ಶೂನ್ಯವೇಳೆ ಆದ ಮೇಲೆ ಅವಕಾಶ ಕೊಡಲು ಅವರು ಕೇಳಿದ್ದಾರೆ. ಪ್ರಶ್ನೋತ್ತರ ಕಲಾಪಕ್ಕೂ ನಿಲುವಳಿ ಮಂಡನೆಗೆ ಅವಕಾಶ ಕೇಳಿಲ್ಲ ಎಂದು ಸ್ಪಷ್ಟಪಡಿಸಿದರು.

ಈ ನಡುವೆ ಸ್ಪೀಕರ್‌ ಕೂಡಾ ಬಿಜೆಪಿಯವರ ಚರ್ಚೆಗೆ ಈಗ ಅವಕಾಶ ಕೊಡೋದಿಲ್ಲ. ಪ್ರಶ್ನೋತ್ತರ ಕಲಾಪ ಶುರುವಾಗಿದೆ. ಅದು ಮುಗಿಯಲಿ ಎಂದು ಹೇಳಿದರು. ಸದನದ ಭಾವಿಗಿಳಿದು ಬಿಜೆಪಿ ಪ್ರತಿಭಟನೆ ಮಾಡಿದ್ದರಿಂದ ಕಲಾಪ ಮುಂದೂಡಲಾಯಿತು. ಪರಿಷತ್‌ನಲ್ಲೂ ಕೂಡಾ ಇದೇ ಗದ್ದಲ ನಡೆದಿದ್ದರಿಂದ ಕಲಾಪ ಮುಂದೂಡಲಾಗಿದೆ.