ನರಸಿಂಹ ಸ್ವಾಮಿ ಹುಂಡಿಯಲ್ಲಿ ಸಿಕ್ತು 100 ಕೋಟಿ ರೂಪಾಯಿ ಚೆಕ್..!
ವಿಶಾಖಪಟ್ಟಣಂ (ಆಂಧ್ರಪ್ರದೇಶ); ದೇವರ ಹುಂಡಿಯಲ್ಲಿ ಪತ್ರಗಳು, ವಸ್ತುಗಳು ಏನೇನೋ ಸಿಗುತ್ತಿರುತ್ತವೆ. ಆದ್ರೆ, ಇಲ್ಲೊಂದು ದೇವಸ್ಥಾನದಲ್ಲಿ ಚೆಕ್ ಒಂದು ಸಿಕ್ಕಿದ್ದು, ಹುಂಡಿ ಎಣಿಸುತ್ತಿರುವವರನ್ನು ಬೆಚ್ಚಿಬೀಳಿಸಿದೆ. ಯಾಕಂದ್ರೆ, ಆ ಚೆಕ್‌ನಲ್ಲಿ ಬರೋಬ್ಬರಿ 100 ಕೋಟಿ ರೂಪಾಯಿ ಎಂದು ಬರೆಯಲಾಗಿದೆ. ಕೋಟಕ್‌ ಮಹಿಂದ್ರ ಬ್ಯಾಂಕ್‌ ನಲ್ಲಿನ ಉಳಿತಾಯ ಖಾತೆಯ ಚೆಕ್ ಇದಾಗಿದೆ.
ಆಂಧ್ರಪ್ರದೇಶದ ವಿಶಾಖಪಟ್ಟಣಂನ ಸಿಂಹಾಚಲಂ ವರಾಹಲಕ್ಷ್ಮಿ ನರಸಿಂಹ ಸ್ವಾಮಿ ಹುಂಡಿಯನ್ನು 15 ದಿನಕ್ಕೊಮ್ಮೆ ಎಣಿಸಲಾಗುತ್ತದೆ. ನಿನ್ನೆ ಕೂಡಾ ಹುಂಡಿಯಲ್ಲಿನ ಹಣ ಎಣಿಸಲಾಗಿದ್ದು, ಈ ವೇಳೆ ಈ ಚೆಕ್ ಸಿಕ್ಕಿದೆ. ಬೊಡ್ಡೆಪಲ್ಲಿ ರಾಧಾಕೃಷ್ಣ ಅವರ ಉಳಿತಾಯ ಖಾತೆಗೆ ಸೇರಿದ್ದ ಚೆಕ್ ಇದಾಗಿದೆ. ಭಾರಿ ಮೊತ್ತದ ಚೆಕ್ ಪತ್ತೆಯಾಗುತ್ತಿದ್ದಂತೆ ಅಧಿಕಾರಿಗಳು ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.
ಚೆಕ್ ಸಂಖ್ಯೆ MVP ಡಬಲ್ ರೋಡ್ ಶಾಖೆಯ ಹೆಸರಿನಲ್ಲಿದ್ದು,. ಅಧಿಕಾರಿಗಳು ಹಾಗೂ ಮಾಧ್ಯಮ ಪ್ರತಿನಿಧಿಗಳು ಆ ಬ್ಯಾಂಕ್‌ ಶಾಖೆಗೆ ಹೋಗಿ ಚೆಕ್‌ಗೆ ಸಂಬಂಧಿಸಿದ ಅಕೌಂಟ್‌ನಲ್ಲಿ ಎಷ್ಟು ಹಣ ಇದೆ ಎಂದು ಪರಿಶೀಲನೆ ಮಾಡಿದ್ದಾರೆ. ಈ ವೇಳೆ ಅಕೌಂಟ್‌ನಲ್ಲಿ 17 ರೂಪಾಯಿ ಮಾತ್ರ ಇರೋದು ಗೊತ್ತಾಗಿದೆ. ತಮಾಷೆಗೆ ಹೀಗೆ ಭಾರಿ ಮೊತ್ತದ ಚೆಕ್‌ನ್ನು ಹುಂಡಿಗೆ ಹಾಕಿರುವುದು ಗೊತ್ತಾಗಿದೆ. ಅಧಿಕಾರಿಗಳು ಸಂಬಂಧಪಟ್ಟ ವ್ಯಕ್ತಿ ಕರೆಸಿ ಎಚ್ಚರಿಕೆ ಕೊಟ್ಟಿದ್ದಾರೆ. ಮುಂದೆ ಇಂತಹ ದುರ್ವರ್ತನೆ ತೋರಿದರೆ ಕಾನೂನು ಕ್ರಮ ಕೈಗೊಳ್ಳುವ ಎಚ್ಚರಿಕೆ ನೀಡಲಾಗಿದೆ.
